Presidenti amerikan Donald Trump ka kërcënuar sot se do të rrisë ndjeshëm tarifat doganore për produktet që importohen nga India në SHBA, duke e akuzuar këtë vend se po përfiton nga tregtia me naftë ruse.
Në një postim në platformën Truth Social, Trump shkroi:
“India jo vetëm që blen sasi të mëdha nafte nga Rusia, por një pjesë të madhe të saj më pas e shet në tregun e hapur duke nxjerrë fitime të mëdha. Nuk u intereson se sa njerëz po vriten në Ukrainë nga makina ushtarake ruse.”
Ai paralajmëroi:
“Për këtë arsye, do të rris në mënyrë të konsiderueshme tarifat që India paguan për të eksportuar drejt SHBA.”
Trump nuk dha detaje mbi nivelin e ri të tarifave që synon të vendosë.
Javën e kaluar, ai kishte deklaruar gjithashtu se do të vendoste një tarifë 25% ndaj produkteve indiane, duke shtuar se India, e pesta ekonomi më e madhe në botë, do të përballet edhe me “një dënim shtesë”, pa dhënë sqarime të mëtejshme.
Ndërkohë, dy burime nga qeveria indiane i thanë agjencisë Reuters gjatë fundjavës se India do të vazhdojë blerjet e naftës ruse, pavarësisht paralajmërimeve të Trump.
