Presidenti i SHBA-së, Donald Trump, ka thënë se mendon që homologu i tij ukrainas, Volodymyr Zelensky, është i gatshëm t’ia lëshojë Krimenë Rusisë si pjesë të një marrëveshjeje paqeje - pavarësisht refuzimeve të mëparshme të Kievit për çdo propozim të tillë.
I pyetur nëse mendonte që presidenti ukrainas ishte gati të lëshonte kontrollin e gadishullit të tij jugor, i cili u aneksua në mënyrë të paligjshme nga Rusia në vitin 2014, Trump u përgjigj: “Mendoj se po”.
Trump gjithashtu i kërkoi Presidentit rus Vladimir Putin të “ndalojë të shtënat, të ulet dhe të nënshkruajë një marrëveshje” për t’i dhënë fund luftimeve, duke sugjeruar që kjo mund të arrihet brenda dy javësh.
Ai i bëri komentet për gazetarët pasi u kthye nga Vatikani, ku zhvilloi një takim të shkurtër me Zelenskyn para funeralit të Papa Françeskut.
Trump tha se takimi kishte “shkuar mirë” dhe se Krimea ishte diskutuar “shumë shkurt”.
Ai tha gjithashtu se Zelensky tani dukej “më i qetë”, në atë që mund të kishte qenë një referencë për një përplasje shumë publike midis dy presidentëve në Shtëpinë e Bardhë në shkurt.
Ukraina ka refuzuar vazhdimisht të bëjë çdo lëshim territorial, duke theksuar se çështjet në lidhje me tokën duhet të diskutohen vetëm pasi të arrihet një armëpushim.
As Zelensky dhe as Presidenti rus Vladimir Putin nuk i janë përgjigjur publikisht komenteve të fundit të Trump. Më herët të dielën, Ministri gjerman i Mbrojtjes Boris Pistorius e paralajmëroi Ukrainën të mos binte dakord për një marrëveshje që përfshin lëshime gjithëpërfshirëse territoriale në këmbim të një armëpushimi.
Ai i tha transmetuesit publik gjerman ARD se Kievi "nuk duhet të shkojë aq larg sa propozimi i fundit nga presidenti amerikan", i cili sipas tij do të përbënte një "kapitulim".
Ministri gjerman tha se Ukraina e dinte se mund të duhej të ndahej nga një pjesë e territorit për të siguruar një armëpushim.
"Por ata sigurisht nuk do të shkojnë aq larg - ose nuk duhet të shkojnë aq larg sa propozimi i fundit nga presidenti amerikan. Ukraina mund të kishte marrë një vit më parë atë që përfshihej në atë propozim, është e ngjashme me një kapitullim. Nuk mund të dalloj ndonjë vlerë të shtuar", tha Pistorius.
Trump tha javën e kaluar se "shumica e pikave kryesore të marrëveshjes janë rënë dakord". Raportet sugjerojnë se Ukrainës mund t'i kërkohet të heqë dorë nga pjesë të mëdha toke të sekuestruara nga Rusia, përfshirë Krimenë. Versus.al
