Presidenti i SHBA-së, Donald Trump, po i shtyn Kinën dhe Indinë të ndalojnë blerjen e naftës nga Rusia duke i akuzuar se me një veprim të tillë, po ndihmojnë në financimin e luftës së Kremlinit kundër Ukrainës.
Trump po e ngre këtë çështje ndërsa kërkon të shtyjë Presidentin rus Vladimir Putin që të bjerë dakord për një armëpushim.
Por nafta e lirë ruse u sjell dobi rafinerive në ato vende, si dhe plotëson nevojat e tyre për energji, dhe ato nuk po tregojnë asnjë prirje për ta ndaluar këtë praktikë.
Tre vende janë blerës të mëdhenj të naftës ruse
Kina, India dhe Turqia janë përfituesit më të mëdhenj të naftës që dikur shkonte në Bashkimin Evropian. Vendimi i BE-së për të bojkotuar pjesën më të madhe të naftës ruse të transportuar nga deti që nga janari 2023 çoi në një zhvendosje masive të flukseve të naftës së papërpunuar nga Evropa në Azi.
Që atëherë, Kina ka qenë blerësi numër 1 i përgjithshëm i energjisë ruse që nga bojkoti i BE-së, me rreth 219.5 miliardë dollarë naftë, gaz dhe qymyr rus, e ndjekur nga India me 133.4 miliardë dollarë dhe Turqia me 90.3 miliardë dollarë. Para pushtimit, India importonte relativisht pak naftë ruse. Versus.al
