Një çift shqiptarësh u vu në pranga, pasi u kapën në flangrancë nga policia greke me një sasi të konsiderueshme lëndësh e bimësh narkotike si dhe një arsenal armësh.
2 kilogramë kokainë, 16 kilogramë kanabis, dy kallashnikovë dhe një pistoletë me karikator dhe 13 gëzhoja, sipas mediave greke, u zbuluan gjatë një kontrolli të ushtruar në automjetin tip “Volkswagen” me targa IOT-2908 në Koridhalo të Athinës.
Mediat e vendit fqinj njoftojnë se në pranga janë vënë drejtuesi dhe pasagjeri i mjetit; shtetasit shqiptarë Redian Kallashi 40- vjeç dhe 36 vjeçarja Elisabeta Telo. Oficerët e policisë kanë pikasur automjetin me dy persona, lëvizjen e të cilit e kanë cilësuar të dyshimtë dhe i kanë ndaluar për kontroll, në kuadër të të cilit është gjetur dhe konfiskuar një çantë me mbi 1 kg kanabis i papërpunuar.
Policia greke ka vijuar kontrollin në banesën e tyre në rrugën “Zanni” nr. 76 në Pire, ku janë gjetur dhe sekuestruar: 2 kilogramë e 950 gram kokainë, 15 kg e 819 gram kërp i papërpunuar, 2 pushkë ushtarake tip kallashnikov, pistoletë me karikator dhe 13 gëzhoja, 4 karikatorë pushkë ushtarake me gjithsej 120 fishekë, shuma e parave 12.450 euro, 4 telefona, 3 peshore elektronike precize, pajisje mbyllëse ambalazhi.
