Kryetari i Partisë së Lirisë, Ilir Meta ka mbajtur një konferencë për media gjatë mesditës së sotme duke vënë theksin tek disa nga çështjet më të nxehta që nga vendimi i Gjykatës Kushtetuese për mandatin e Olta Xhaçkës deri tek zgjedhjet e Himarës.
Ai e cilësoi Kushtetuesen si zgjatim të asaj që e ka quajtur ‘Ramaforma’, ndërsa nuk ka lënë pa përmendur dhe kryebashkiakun e Tiranës Erion Veliajn i cili sipas tij duhet të ishte arrestuar 4 vite më parë, veçanërisht për aferën e incineratorëve.
“Konflikti i interesave është në nivelet me të jashtëzakonshme. Gjykata Kushtetuese është i kapur nga Rama-forma. Qëndrimet e saj duhet të kishin qenë të qarta dhe të prera me kohë” tha Meta.
Meta ka bërë të qartë se partia që ai drejton do të jetë pjesë e protestës së nesërme, organizuar nga Partia Demokratike, ndërsa ka theksuar se në lidhje me zgjedhjet në Himarë është po në të njëjtën vijë me partinë më të madhe opozitare në vend.
“Lidhur me zgjedhjet në Himarë duhet të vlerësoj se gjithçka është pjesë e një skenari mafioz që s'ka lidhje me Shtetin e së Drejtës dhe me parimet mbi të cilat ai funksion. Gjithçka është bërë fakt i kryer me një kohë rrufe duke tentuar për të marrë me forcë, me dhunë, në mënyrë të paligjshme bashkinë e Himarës atë e cila nuk u arrit të merrej as me dhunë, as me forcë, as me rrëmbimin mafioz që iu bë zotit Fredi Belerit dy netë para zgjedhjeve. Është tepërt e qartë se vendi është në momente më të errta të demokracisë dhe të respektimit të shtetit ligjor pasi të gjithë e dimë se për ta çuar zotin Beleri për të bërë betimin ishte e pamundur por për të çuar në KQZ për ti hequr mandatin ishte plotësisht e mundur. Ky është një regjim policor që duhet të shembet. Dhe për çështjen e Himarës do të kemi të njejtin qëndrim me Partinë Demokratike”, u shpreh Meta./ Versus.al
