Ministri i ka propozuar kreut të qeverisë, Edi Ramës, emrin e Ilir Prodës për postin e Drejtorit të Përgjithshëm të Policisë së Shtetit.
Pas këtij propozimi, mësohet se vendimi do të merret në mbledhjen e radhës së qeverisë.
Kush është Ilir Proda?
Ilir Proda mban aktualisht postin e drejtorit të Policisë së Elbasanit, ndërsa ka një karrierë prej 17 vitesh në Policinë e Shtetit.
Ai ka mbaruar Akademinë e Policisë në vitin 2005 ndërsa e ka nisur karrierën e tij fillimisht si specialist i policisë kriminale në komisariatin nr. 3 dhe më pas në Komisariatin nr:4 në Tiranë.
Në 2013 ai emërohet shef komisariati, detyrë të cilën e mbajti gati një vit dhe dy vite të tjera, deri në vitin 2016 shërbeu si shef i komisariatit të Bulqizës.
Në korrik të vitit 2019 pasi merr gradën kryekomisar ai emërohet zv. drejtor për hetimin e krimeve në Korçë.
Ndërsa në 2021 emërohet në po të njëjtën detyrë në policinë e Elbasanit.
Në mars të vitit 2023, pasi mori gradën drejtues, ai u emërua drejtor i policisë Elbasan.
Së fundmi emri i tij është lakuar pasi iu mor telefoni për verifikim nga SPAK në lidhje me dekonspirimin e operacionit 'Çopaj' në Elbasan.
Në garë për postin e drejtorit pas disa skualifikimeve mbetën Altin Mena, Ardian Çipa, Ilir Proda, Neritan Nallbati dhe Skënder Hita./Versus.al
