Kombëtarja e Kosovës mbrëmjen e djeshme humbi me rezultatin 1-0 me Turqinë, duke humbur mundësinë për të realizuar ëndrrën e kualifikimit në Botëror.
Pas përfundimit të ndeshjes, në fushë u pa një moment i pazakontë, kur një tifoz hyri në stadium duke mbajtur një flamur shqiptar në krahë.
Për një çast, ai e vendosi flamurin në tokë për të bërë foto me futbollistin Milot Rashica.
Situata kaloi pa ndërhyrje të menjëhershme nga lojtarët e Kosovës, por më pas ndërhyri mbrojtësi i ekipit turk, Abdulkerim Bardakci, i cili e mori flamurin nga toka dhe ia dorëzoi sërish Rashicës.
Ky gjest i futbollistit turk është vlerësuar gjerësisht në rrjetet sociale, duke u cilësuar si një moment respekti dhe sportiviteti në fund të një ndeshjeje të fortë emocionale.
