“Drejtojuni Prokurorisë së Posaçme për të marrë informacione”, kjo ka qenë deklarata e deputetit socialist Jurgis Çyrbja për mediat pak momente pasi ka dalë nga ambientet e SPAK ku sipas burimeve të Versus.al i është komunikuar akuza lidhur me kallëzimin penal të dorëzuar nga deputeti demokrat, Edi Paloka në 2021-in, i cili e akuzonte për "shpërdorim detyre" gjatë kohës që mbante postin e drejtorit të Hipotekës së Durrësit. 

Duke u treguar i rezervuar për mediat, Çyrbja u largua nga ambientet e SPAK ku qëndroi për rreth 30 minuta. Ndërsa 4 ditë më parë, deputeti u mor në pyetje për rreth 5 orë. Pavarësisht kësaj, deputeti deklaroi se nuk kishte probleme ligjore dhe vetëm dje dorëzoi mandatin në Kuvend duke pretenduar se po e bënte për arsye shëndetësore. Versus.al

Momenti kur Çyrbja dhe avokatja e tij hyjnë në SPAK

Deputeti socialist Jurgis Çyrbja ka mbërritur në ambientet e Prokurorisë së Posaçme i shoqëruar nga avokatja e tij, një ditë pasi dorëzoi mandatin e ligjvënësit.

“Mirëmëngjesi, jeni mirë ju?”- ky ka qenë komenti i vetëm që deputeti ka pasur për gazetarët pasi më herët kishte pretenduar se dorëzimi i mandatit të tij lidhej me një ndërhyrje shëndetësore që do të kryente dhe jo me probleme ligjore.

Burime për Versus.al bëjnë me dije se sot pritet që Çyrbjas t’i komunikohet akuza nga SPAK për kallëzimin e bërë nga deputeti demokrat Edi Paloka i cili në 2021-in denoncoi se Çyrbja në prag të zgjedhjeve parlamentare, shpërndante legalizime në Kadastrën e Durrësit edhe pse nuk mbante më postin e drejtorit të Hipotekës. Po ashtu emri i deputetit socialist dyshohet se është përmendur në një dosje tepër të rëndë. Versus.al

Deputeti i Partisë Socialiste, Jurgis Çyrbja, i cili ditën e djeshme dorëzoi mandatin me arsyetimin se do të kryente një ndërhyrje shëndetësore që do t’i pamundësonte angazhimin në politikë për 3 muaj, është thirrur sërish në SPAK.

Prokuroria e Posaçme i ka caktuar orën 10:00 Çyrbjas për t’u paraqitur për të dytën herë brenda pak ditësh. Herën e parë, deputeti u pyet në SPAK për pesë orë rresht dhe kur doli u shfaq i buzëqeshur dhe tha për mediat se nuk ishte marrë i pandehur.

Dy ditë pasi u mor në pyetje, dorëzoi mandatin e deputetit. Në përgjigjie të interesimit të mediave, Jurgi Çyrbja pretendoi se ky akt i tij nuk lidhet me paraqitjen në SPAK duke theksuar se nuk ka probleme ligjore. Por menjëherë pasi dorëzoi mandatin, Çyrbja u thirr sërish në SPAK duke ngritur dyshimet se dorëheqja e tij nuk ka qenë vetëm për shkaqe shëndetësore.

Për çfarë u mor në pyetje Çyrbja?

Raportohet se marrja në pyetje e deputetit është bërë për një denoncim të dorëzuar në SPAK nga deputeti demokrat Edi Paloka në 2021-in kur Çyrbja mbante postin e drejtorit të hipotekës së Durrësit. Paloka e akuzonte për shpërodim detyre për firmosjen brenda të njëjtës ditë të dy praktikave për të njëjtën pronë, por në dy emra të ndryshëm duke realizuar kështu mbivendosje prone.  Njësoj në kallëzim pretendohej nga Paloka se javët e fundit të fushatës zgjedhore të 2021-it, Çyrbja ka qenë i pranishëm në Kadastrën e Durrësit duke shpërndarë legalizime edhe kur nuk ishte më drejtor hipoteke me qëllim ndikimin në vullnetin e zgjedhësve. Por gjithashtu dyshohet se emri i deputetit përmendet në një prej dosjeve më të 'nxehta' të momentit.

Mandatin e Çyrbjas në Kuvend pritet ta marrë Erjon Meka, pasardhësi i listës së kandidatëve për deputetë në qarkun e Durrësit në prill të vitit 2021. Versus.al