Çfarë do të gjeni në brendësi
*Situata me zjarret në vend paraqitet katastrofike. Në gjithë vendin sipas ministrisë së Mbrojtjes, janë raportuar 27 vatra zjarri aktive, ndërsa pjesa më problematike paraqitet në Gramsh dhe në jug të vendit ku janë shkrumbuar plotësisht dhjetëra fshatra duke bërë që banorët të evakuoheshin gjatë natës. *Numri i viktimave ka shkuar në 2 persona. Pasi 80 vjeçari që ndezi zjarrin në Gramsh ndërroi jetë, së fundmi edhe një tjetër person ka vdekur si pasojë e asfiksimit. *Në Delvinë, situata nuk ka patur ndonjë përmirësim të dukshëm gjatë mbrëmjes teksa mungon energjia elektrike dhe banorët e disa fshatrave janë evakuuar. Ministri i Mbrojtjes Pirro Vengu tha se tanimë është vendosur një perimetër sigurie dhe se nuk ka rrezik për banesat. *Fshatra të tërë janë shkrumbuar plotësisht në Gramsh e Delvinë, ndërsa një tjetër vatër e rrezikshme është shfaqur në Gjirokastër. Problematikë mbeten edhe zjarret në Bulqizë ku janë djegur dhjetëra hektarë pyje ahu dhe pisha.
39 banesa të shkrumbuara në Gramsh, 3 helikopterë vijojnë punën për shuarjen e flakëve
Detaje të reja janë mësuar nga situata e rënduar me zjarret në Gramsh. Deri më tani raportohet për 39 banesa të shkrumbuara në 6 fshatra.
Ndërkohë përsa i takon situatës së zjarreve, ministri i Mbrojtjes Pirro Vengu bën me dije se aktualisht 3 helikopterë po punojnë për shuarjen e flakëve në Gramsh dhe 2 të tjerë në Delvinë, në terren janë qindra efektivë të zjarrfikësve dhe emergjencave lokale që po punojnë për shuarjen e vatrave të zjarrit në qarqe të ndryshme të vendit. Versus.al
VIDEO/ Banorët e dorëzuar shohin me trishtim katastrofën natyrore, Reuters publikon pamje nga Delvina
Zjarri masiv që shpërtheu në Delvinë ka shkaktuar dëme të shumta me banesa e fshatra të tërë që janë shkrumbuar nga flakët. Pamjet ku banorët shfaqen të trishtuar për tokat e sipërfaqet me pemë që po digjeshin së bashku me banesat, janë pasyruar edhe nga Reuters.
Fotografitë e shkrepura nga fotografi Florion Goga tregojnë vendin e shkrumbuar nga flakët ndërsa banorët shohin të dorëzuar katastrofën natyrore.
Si pasojë e rrezikut nga flakët, u evakuuan banorët e zonës si dhe spitali i Delvinës, ndërsa zjarret rrezikuan edhe puset e naftës. Versus.al
View this post on Instagram
Dy të vdekur nga zjarri në Elbasan, dhjetëra banesa të djegura e fshatra të shkrumbuar
Elbasan- Është shënuar viktima e dytë në këtë qark si pasojë e flakëve që u përhapën me shpejtësi në Gramsh dhe disa fshatra të tjerë që janë shkrumbuar plotësisht.
Pas 80 vjeçarit i cili humbi jetën ditën e djeshme pasi zjarri që ndezi në oborrin e tij doli jashtë kontrollit, ka ndërruar jetë edhe një tjetër person si pasojë e asfiksisë nga zjarri.
Dhjetëra banesa janë shkrumbuar plotësisht ndërsa fshatrat që u përfshinë nga flakët një ditë më parë, Kullollash, Bletëz, Skënderbegas, Menkollare, Zenele dhe Harunas, janë djegur plotësisht. Versus.al
Flakët ende jashtë kontrollit në Gramsh, zj*rret shkrumbojnë disa fshatra
Problematika të mëdha për vatrat e zjarrit që kanë përfshirë vendin, janë shfaqur edhe në Gramsh ku zjarri ka vijuar me intensitet të lartë.
Si pasojë e erës, flakët janë përhapur edhe në zona të ndryshme. Në skënderbegas po digjet edhe fshati i fundit.
Situata me dëmin e shkaktuar si pasojë e flakëve është tejet e rëndë pasi 6 fshatra janë shkrumbuar totalisht. Në njësinë Kodovjat, zjarri është shumë afër fshatit Posnovisht dhe më pas fshatrat e tjerë janë zinxhir afër me njëri-tjetrin.
Që prej ditës së djeshme janë evakuuar qindra banorë të zonave pasi flakët kanë shkrumbuar edhe disa shtëpi. Versus.al
Shqipëria në fl*kë! Qindra banorë të evakuuar nga Delvina e Gramshi! Situatë e rëndë, vatër e re zjarri rrezikon Gjirokastrën
Vendi u përball dje me një situatë emergjente sa i takon vatrave të zjarrit të përhapura në Delvinë dhe Gramsh duke bërë që një 80 vjeçar të humbte jetën dhe disa të tjerë të dëmtoheshin si pasojë e asfiksimit nga tymi.
Situata më dramatike u paraqit në Delvinë ku banorët u evakuuan për të shmangur rrezikimin e jetës së tyre pasi flakët po u afroheshin shtëpive në një situatë që dukej tepër dramatike. Aktualisht mësohet se një pjesë e madhe e forcave zjarrfikëse dhe atyre të armatosura janë zhvendosur në Delvinë për të tentuar shuarjen e flakëve, ndërsa sipas ministrit të Mbrojtjes Pirro Vengu, nuk ka më rrezik për banesat.
Zjarri në Delvinë rrezikoi banesat e banorëve të fshatrave Pecë, Kranë, Krongj, Kardhikaq dhe Sirakat. Për shuarjen e flakëve janë angazhuar 2 avionë grekë PLZ, 1 helikopter çek dhe një sllovak.
Në informacionin e dhënë nga ministria thuhet se në gjithë vendin aktualisht janë 27 vatra zjarri aktive. Një tjetër vatër e rrezikshme raportohet në fshatin Hormovë të bashkisë Tepelenë ku mësohet se që prej orës 04:00 të mëngjesit forcat e mbrojtjes nga zjarri dhe shpëtimi, po punojnë për të izoluar flakët duke mos lejuar që të përhapen edhe në Gjirokastër. Për shkak të bimësisë së dendur dhe afërsisë me disa fshatra, zona paraqet rrezik të lartë. Versus.al
