Çfarë do të gjeni në brendësi
*Protestuesit e opozitës kërkojnë të thyejnë gardin e policisë dhe të hyjnë në Kuvend me thirrjet “jemi luanë të Sali Berishës”. Versus.al publikon fotot nga momentet e përplasjes me efektivët. *Flamur Noka rikthehet me dhunë në sallë pas përjashtimit nga seanca plenare dhe tenton të marrë mikrofonin e Nasip Naços për të folur. Nikolla e paralajmëron për masa më të ashpra. *Mazhoranca rrëzon kërkesën e Gazment Bardhit për mocion me debat në Kuvend për rrëfimin e Ahmetajt në “Rai 3”. Seanca ndërpritet për të tretën herë për shkak të bllokimit të foltores nga deputetët e opozitës. *Kreu i grupit parlamentar, Gazment Bardhi ka akuzuar Ramën dhe Shërbimin Informativ Shtetëror për lidhje me krerë të krimit të organizuar. *Ministrja Elisa Spiropali u kërkon deputetëve demokratë t’u bashkohen protestuesve jashtë Kuvendit në mënyrë që të jenë më të shumtë në numër. *Kryeparlamentarja Lindita Nikolla përjashton nga seanca deputetin Flamur Noka pas prishjes së rendit në sallën e Kuvendit. *Protestuesit jashtë Kuvendit u vënë flakën gomave nën thirrjet për rrëzimin e qeverisë së Edi Ramës.
FOTOLAJM/ Protestuesit duan të hyjnë në Kuvend: Jemi luanë të Sali Berishës
Opozita ka mbajtur sot përballë Kuvendit një protestë për akuzat e bëra nga ish-zv.kryeministri Arben Ahmetaj në investigimin e “Rai 3” ndaj qeverisë dhe kryeministrit Edi Rama për të cilin tha se ka lidhje me krerë të krimit të organizuar.
Folësit në tubim u përpoqën të nixin protestuesit që të përplasen me policinë dhe më pas të hyjnë në Kuvend ku po zhvillohej seanca plenare.
“Jemi luanë të Sali Berishës, shtyni përpara vëllezër, ta pushtojmë Kuvendin! Parlamenti na takon ne, ta çlirojmë sot”, ishin disa prej thirrjeve që kërkonin të nxisnin revoltën tek protestuesit të cilët hodhën vezë e mollë ndaj policisë.
Më poshtë disa prej fotove nga përplasja mes protestuesve dhe efektivëve të policisë:
U përjashtua nga seanca, Noka hyn me dhunë në sallë dhe shtyn me bërryl punonjësin e Gardës
Deputeti Flamur Noka i cili u përjashtua nga salla e Kuvendit është rikthyer në seancë duke marrë me dhunë mikrofonin e një deputeti ndërsa shihet teksa shtyn me bërryl punonjësin e Gardës që tentoi ta largonte.
Kryeparlamentarja, Lindita Nikolla e paralajmëroi Nokën se ndaj tij do të ketë masa akoma më të ashpra pasi theu masën e përjashtimit nga seanca plenare e sotme.
Seanca u mbizotërua nga tensionet që u shtuan pas rrëzimit të kërkesës së opozitës për mocion me besim lidhur me investigimin e 'Rai 3", ku Arben Ahmetaj hidhte akuza të drejtëpëdrejta ndaj kryeministrit Edi Rama për lidhje të këtij të fundit me krimin e organizuar. Versus.al
Replikat në Kuvend, Bardhi: SHISH i shërben krimit të organizuar
Kryetari i grupit parlamentar të Rithemelimit, Gazment Bardhi ka reaguar pas refuzimit të të kërkesës së tyre për mocionin me debat me kryeministrin Edi Rama për çështjen e investigimit të RAI3.
Bardhi: Të nderuar qytetarë shqiptar ajo që që kryetarja e Kuvendit ka vendosur të bëj për mocionin për debat të kërkuar nga grupi parlamentar nga Partia Demokratike nuk është thjesht një shkelje e Kushtetutës dhe e Rregullores por është pjesë e një filozofie që kanë shpallur luftën ndaj krimit të organziuar si jashtë fushës së veprimtarisë së Këshillit të Minsitrave. Dhe argumenti i dytë që më ka dhënë kryetarja e Kuvendit më thotë në kërkesën për mocion nuk e kam përmendur asnjëherë kryeminsitrin, kam referuar të dhëna publike rastet e dekriminalizmit dosjet penale që tregojnë lidhjet mes politikës dhe krimit padyshim informacione dhe investigime të kryera nga nga media më thotë ke shkelur etikën sepse ke cënuar se këta e dini se Edi Rama është i lidhur me krimin. Unë nuk e kam përmendur këtu por këta e din vetë se po përfaqësuesi i krimit të organizuar në Shqipëri është Edi Rama.
Nëse ti përmend debat për krimin e organizuar këta shfaqin se ne kërkojmë debat për Edi Ramën. Dhe më thotë ke cënuar intregritetin personal dhe individual dhe politik të figurës Kushtetuese të kryeminsitrit.
Ju e dini shumë mirë që Edi Rama ka caktuar një përfaqësues për lidhjet me krimin.
Nuk e dini ju këtë? Por jeni njësoj si Arben Ahmetaj që nëpërkafe të Tiranës përshpërisni se po shtetasi Ergys Agasi është kordinatori i posaçëm i Edi Ramës me krimin e organizuar. Nisi ta testonte në Durrës. Ju e dini të gjithë. E dërgoi më pas në Shkodër, e dërgoi në Elbasan, në Vlorë në gjithë Shqipërinë dhe pasi krijoi të gjitha fijet dhe lidhjet e tij me krimin e organziuar e dini çfarë bëri Edi Rama dhe këtu është turpi i Presidentit të Republikës, njeriun e Ergys e Agastit e emëroi drejtor i Shërbimit Informativ Shtetëror dhe sot SHISH i shërben krimit të organizuar.
Rrëzohet mocioni për debat për investigimin e “Rai 3”, ndërpritet për herë të tretë seanca
Seanca plenare në Kuvend është ndërprerë sot për të tretën herë.
Pas rrëzimit të kërkesës së Gazment Bardhit për mocion me debat lidhur me akuzat e Arben Ahmetajt ndaj Ramës në investigimin e “Rai 3”, seanca plenare është përfshirë nga kaosi.
Deputetët e opozitës kanë bllokuar foltoren e Kuvendit duke penguar vijimin normal të seancës. Në kushte të tilla, Nikolla kërkoi ndërprerjen e seancës për 5 minuta pushim, për të tretën herë pas përplasjeve me Flamur Nokën.
Mocioni i opozitës për debat mbi investigimin e "Rai 3", lidhet me akuzat e ish-zv.kryeministrit, Arben Ahmetajt i cili gjatë një darke me gazetarin italian rrëfente sesi kryeministri Edi Rama kishte një koordinator për lidhjet me grupet kriminale të vendit. Versus.al
Përplasje jashtë Kuvendit, protestuesit tentojnë të thyejnë kordonin e policisë! Hedhin sende të forta
Protestuesit e opozitës jashtë Kuvendit, janë përplasur me efektivët e policisë në tenativë për të thyer kordonin rrethues dhe për të hyrë drejt sallës ku po zhvillohet seanca plenare.
“Të hyjmë në Kuvend, të çlirojmë sallën e parlamentit"- ishin disa prej thirrjeve të protestuesve që morën fjalën në protestë.
Drejt efektivëve të policisë janë hedhur edhe sende të forta. Versus.al
Përplasjet në Kuvend, Spiropali i drejtohet Rithemelimit: Ushtria e turpit. Dilni jashtë dhe shtoni numrin e protestuesve
Deputetja e Partisë Socialiste Elisa Spiropali ka replikuar me deputetin e Rithemelimit Flamur Noka në seancën e sotme parlamentare i cili kërkoi rikthminin e Sali Berishën në grupin e PD si dhe mocionin me debat për emisionin e RAI3 për Shqipërinë.
Spiropali: Kjo që po bëni ju nuk quhet opozitë ka vetëm një emër utopia, ushtria e turpit të opozitarëve pa ide.Të vini këtu dhe të bllokoni foltoren unë mund t'ju tregoj vetëm rregulloren me çfarë tërhiqet vëmëndja dhe pastaj nxirreni jashtë kësaj salle për prishje rendi ose ndryshe e mbyllim këtë votinm derisa të mësohen. Ishte e parashikuar kjo që po bëni asamblia utopia.
Është e parashikuar kjo që bërë nga RAI 3 etj. Nuk është hera e parë që ansambli utopia i ka bërë këto. Në 2009 Flamur kur menduar që gjetët shkas ju për të djegur mandatet, nuk doni të kuptonit as atëherë, as tani se sapo kishte filluar dimri juaj. Nuk e kuptonit as në 2019, se i besuat edhe vetë propagandës.
Jeni shumë komik me tekstin dramatik që recitoni. Është më mirë të dilni jashtë dhe të shtoni numrin e protestuesve sepse këtu jeni shumë pak. Këtë po e them në dashamirësinë e një njeriu që do të zhvillojë normalisht seancën.
“Nuk më kërcënon dot”, Nikolla përjashton Nokën nga seanca! Garda rrethon foltoren e Kuvendit
Deputeti Flamur Noka është përjashtuar nga seanca plenare e Kuvendit pas përplasjeve me kryeparlamentaren Lindita Nikolla dhe ministren e Shtetit për Marrëdhënien me Parlamentin, Elisa Spiropali.
Noka: Je figura e turpit të këtij parlamenti, do mbetesh në histori si përfaqësuese e narko-shtetit.
Nikolla: Të të vijë turp se je dhe burrë malësor. Ti mua nuk më kërcënon dot as nuk më intimidon dot. Je i përjashtuar nga seanca dhe respektoni rregulloren e Kuvendit.
Seanca u ndërpre për të dytën herë për pushim 5 minutësh deri në vendosjen e qetësisë në Kuvend. Ndërkohë, ministrja Elisa Spiropali kërkoi që seanca të ndërpritet dhe të kalohet direct në votimin e përbërjes së komisioneve “Antikorrupsion” dhe të “Dezinformimit” të propozuar nga socialistët. Versus.al
Bardhi kërkon rikthimin e Berishës në grupin e PD-së, Nikolla: Futet me vendim partie
Kërkesa e nënkryetarit të Rithemelimit Gazment Bardhit për mocionin me debat për emisionin e RAI3 për Shqipërinë nuk është pranuar nga kryetarja e Kuvendit Lindidta Nikolla.
Gjithashtu Bardhi ka kërkuar dhe futjen e Berishës në grupin parlamentar.
Spaho: Ju detyron të njoftoni që Berisha është pjesë e grupit, ca keni ju me vendimet e grupit të PD. Është përgjegjësia jonë të pranojmë në grup ose jo. Ku e gjeni ju të drejtën të merrni vendime të tilla.
Nikolla: Futet me vendim partie në grup.
Baçi: Para disa kohësh keni marrë një vendim për futjen në grup e PD të disa deputetëve të përjashtuar. Janë dy standarde, janë dy qëndrime të kundërta, jeni në shkelje të ligjit.
Rithemelimi po proteston sot para Kuvendit pas publikimit të investigimit të “Rai3” ku shfaqej ish-zv.kryeministri Arben Ahmetaj teksa rrëfente gjatë një darke sesi kryeministri Edi Rama priste në zyrë eksponentë të krimit të organizuar.
Përplasje në Kuvend, Noka “sulet” drejt foltores! Nikolla: Ulu, përfaqësues i non-gratës! Ndërpritet seanca
Seanca plenare në Kuvend është ndërprerë vetëm pak minuta pas nisjes si pasojë e përplasjeve të ashpra mes deputetëve të opozitës dhe kryeparlamentares, Lindita Nikolla.
Deputeti Flamur Noka u çua në këmbë dhe shkoi drejt foltores duke i kërkuar Nikollës të zbatonte rregulloren ndërsa punonjësit e gardës bllokuan foltoren.
Nikolla i kërkoi Nokës të ulej ndërsa ndërpreu seancën për 5 minuta pushim.
Pjesë nga debati:
Nikolla: Ulu në vend zoti Noka se nuk më tremb ashtu. Të të vijë turp.
Noka: Ti je përfaqësueese e Ramës
Lindita: Atëherë ti je përfaqësues i një non-grate.
Reagime pati edhe nga deptutetët e tjerë demokratë të cilët po ashtu u afruan drejt foltores. Versus.al
“Skenar” si te bashkia, protestuesit e opozitës para Kuvendit u vënë flakën gomave
Ashtu si në protestën e fundit të mbajtur para bashkisë së Tiranës të martën, protestuesit e opozitës kanë sjellë goma para Kuvendit të Shqipërisë ku po mbahet protesta pas publikimit të investigimit të “Rai 3” ku ish-zv.kryeministri Arben Ahmetaj bëri rrëfime të rënda kundër Ramës.
Siç shihet edhe në pamjet e publikuara, protestuesit kanë përdorur benzinë për t'u vënë flakën gomave që kishin sjellë para Kuvendit.
Ndërkohë, folësit në protestë bëjnë vazhdimisht thirrje që protestuesit të tentojnë të hyjnë drejt Kuvendit. Versus.al
Rrëfimi i Ahmetajt në investigimin e “Rai 3”, sot opozita proteston para Kuvendit! Disa rrugë të bllokuara
Ditën e sotme në orën 10:00, opozita ka paralajmëruar një protest para Kuvendit pas publikimit të investigimit të “Rai3” ku shfaqej ish-zv.kryeministri Arben Ahmetaj teksa rrëfente gjatë një darke sesi kryeministri Edi Rama priste në zyrë eksponentë të krimit të organizuar.
Protesta do të zhvillohet në të njëjtën orë që nis seanca plenare në Kuvend. Ndërsa policia ka publikuar masat e marra për garantimin e sigurisë dhe rendit publik gjatë zhvillimit të tubimit.
Në zbatim të planit të masave, duke nisur nga ora 08:00 e në vijim, do të ketë bllokim të përkohshëm të qarkullimit të mjeteve në bulevardin Zhan D’Ark dhe rrugën “Xhorxh Bush”. Drejtuesve të automjeteve, ato të transportit publik, si dhe këmbësorët gjithashtu, iu bëhet thirrje që të shmangin këto rrugë dhe të përdorin rrugë alternative.
“Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime dhe i bën thirrje organizatorëve, drejtuesve, pjesëmarrësve në tubime, dhe perfaqësuesve të subjekteve politike, të ushtrojnë të drejtën e tyre në përputhje me Kushtetutën dhe legjislacionin në fuqi.
Policia e Shtetit ka të gjitha kapacitetet për të garantuar të drejtën e tubimit, sipas përcaktimeve ligjore dhe përsërit thirrjen për të respektuar ligjin dhe për t’u distancuar nga çdo akt dhune, pasi nuk do të tolerohen sjellje apo veprime që cenojnë rendin dhe sigurinë publike”, thekson policia në njoftim.
Sot në Kuvend pritet të miratohen edhe përbërjet e komisioneve të Antikorrupsionit dhe Dezinformimit që PS i ka çuar për votim. Versus.al
