Mereme Sela, e cila ishte ndër kandidatet që shprehu interes për të garuar për drejtimin e Partisë Demokratike, ka reaguar publikisht pas skualifikimit të saj nga Komisioni Zgjedhor i kësaj force politike.

Sela e ka cilësuar vendimin si të padrejtë dhe të papranueshëm, duke thënë se është njoftuar për përjashtimin nga gara përmes mediave dhe jo në mënyrë zyrtare, gjë që sipas saj e bën edhe më problematik procesin.

Në deklaratën e saj, ajo ka ngritur akuza ndaj mënyrës së zhvillimit të procesit zgjedhor brenda partisë, duke pretenduar se vlerësimet nuk janë bërë në mënyrë të drejtë dhe në përputhje me statutin.

Sela ka shkuar më tej duke thënë se, sipas saj, nëse do të zbatohej një vlerësim i tillë, atëherë skualifikimi duhej të kishte prekur një figurë tjetër brenda partisë.

Ajo ka paralajmëruar gjithashtu se do të ndjekë të gjitha rrugët ligjore dhe do të dorëzojë ankesë zyrtare për vendimin e marrë ndaj saj, edhe pse shprehet skeptike për një reagim të mundshëm nga strukturat e Partisë Demokratike, duke e konsideruar këtë si një problem të përsëritur brenda saj.

Sipas Selës, mënyra se si janë trajtuar proceset e brendshme zgjedhore ka ndikuar në situatën aktuale të partisë, duke lënë të kuptohet se ajo e sheh këtë si një çështje më të gjerë organizative dhe jo vetëm personale.

Sela: Njoftimin për skualifikimin e kam marrë përmes mediave, çka në vetvete është e papranueshme. Ky vendim është i padrejtë dhe i pajustifikuar. Përkundrazi, nëse do të kishte një vlerësim të drejtë dhe në përputhje me Statutin e partisë, personi që duhej të ishte subjekt skualifikimi është profesori Berisha.

Për këtë arsye, do të ndjek të gjitha procedurat ligjore në dispozicion dhe do të paraqes ankesën time zyrtare. Megjithatë, bazuar në përvojat e mëparshme, nuk pres një reagim apo përgjigje serioze nga Partia Demokratike, pasi kjo ka qenë një praktikë e përsëritur ndër vite. Kjo mënyrë veprimi është një ndër arsyet kryesore pse Partia Demokratike ndodhet në këtë situatë sot./Versus.al

Sali Berisha

Sali Berisha do të jetë kandidati i vetëm për të drejtuar Partinë Demokratike, organizimin politik më të madh të opozitës së vendit. Mësohet se së fundmi janë skualifikuar edhe kandidaturat e mjekes së QSUT, Mereme Sela dhe avokatit Vladimir Malaj.

Përsa i takon Mereme Selës, në vendimin e komisionit të organizimit elektoral thuhet se dokumentacioni i dorëzuar prej saj ishte i rregullt, por nuk plotëson kriterin e figurës me profil shumë të lartë publik dhe politik për të qenë kandidate e forcës opozitare më të madhe në vend.  I njëjti arsyetim është përdorur edhe për kandidaturën e Vladimir Malajt. 

Me këtë vendim, Berisha mbetet i vetmi kandidat në garë për zgjedhjet që do zhvillohen brenda këtij muaji për kreun e PD. Në këto kushte, anëtarët demokratë do të përballen vetëm me pyetjen nëse duan që Berisha të drejtojë sërish PD-në apo jo. 

Ditën e djeshme kur ishte edhe afati final për dorëzimin e kandidaturave, zyrat e PD ishin të mbyllura për përfaqësuesin e Salianjit, Evi Kokalarin dhe avokaten Alesia Balliu të cilët donin të dorëzonin emrat si kandidatë sfidues përballë Berishës. Ata akuzuan kryedemokratin se këtë po e bënte qëllimisht për shkak se kishte frikë nga gara e ndershme. Versus.al