Një nga aktivitetet kryesore të planifikuara për të shënuar 250-vjetorin e pavarësisë së Shteteve të Bashkuara është përfshirë nga polemika, pasi disa artistë të njohur kanë vendosur të tërhiqen nga programi për shkak të lidhjeve të eventit me Presidentin amerikan Donald Trump.
Organizatorët e panairit “The Great American State Fair”, pjesë e nismës “Freedom 250”, konfirmuan të shtunën se vetë Trump do të jetë figura kryesore që do të hapë festimet në National Mall në Uashington.
“Jemi të lumtur të njoftojmë se Presidenti Trump do të inaugurojë personalisht këtë festë historike më 24 qershor”, thuhet në deklaratën e organizatorëve.
Njoftimi vjen pasi disa emra të njohur të muzikës amerikane vendosën të tërhiqeshin nga koncertet e planifikuara. Mes artistëve që kanë anuluar pjesëmarrjen janë Bret Michaels, grupi Commodores dhe këngëtarja Martina McBride.
Në një postim në platformën e tij Truth Social, Trump ironizoi artistët që u larguan nga eventi.
“E kuptoj që artistët po përjetojnë ankth për performancat e tyre”, shkroi ai, duke shtuar me humor se po mendonte të sillte në skenë “njeriun që disa e konsiderojnë presidentin më të madh në histori, Donald J. Trump”, për të zëvendësuar artistët që u larguan.
Në një tjetër reagim, presidenti amerikan sugjeroi se koncertet mund të zëvendësohen me një tubim të madh politik.
“Duhet të organizojmë një tubim gjigant ‘Make America Great Again’ për 250-vjetorin, në vend që të kemi këngëtarë tepër të paguar, që askush nuk dëshiron t’i dëgjojë, muzika e të cilëve është e mërzitshme dhe që vetëm ankohen”, shkroi ai.
Organizata Freedom 250 e prezanton veten si një iniciativë jopartiake, megjithatë ajo u lançua vitin e kaluar nga Trump dhe drejtohet nga ish-zyrtarë të administratës së tij të parë.
Disa prej artistëve që u tërhoqën kanë deklaruar se fillimisht ishin informuar se aktiviteti do të kishte karakter jopartiak. Martina McBride shkroi në rrjetet sociale se asaj iu paraqit një mundësi për të performuar në një event jo politik, por më vonë rezultoi se situata ishte ndryshe nga sa ishte paraqitur fillimisht.
Ndërkohë, disa artistë të tjerë kanë konfirmuar pjesëmarrjen. Në listën e performuesve mbeten reperi Flo Rida, Fab Morvan dhe Vanilla Ice. Përfaqësuesit e këtij të fundit kanë deklaruar se artisti është “krenar që do të kontribuojë në festimin e 250-vjetorit të Amerikës”.
Festimet e mëdha të “Freedom 250” janë planifikuar të zhvillohen nga 25 qershori deri më 10 korrik dhe do të përfshijnë ekspozita historike, aktivitete familjare, koncerte, demonstrime ajrore dhe një sërë aktivitetesh të tjera kushtuar 250-vjetorit të themelimit të Shteteve të Bashkuara.
