Binjakët identikë britanikë, Ross dhe Hugo Turner, kanë ndërmarrë një eksperiment të pazakontë për të krahasuar ndikimin e një diete vegane me atë tradicionale me produkte shtazore. Të njohur për vetë-eksperimentet e tyre shkencore, ata vendosën t’i nënshtrohen një rutine identike për gjashtë muaj me ndryshimin e vetëm në llojin e suplementeve që konsumonin.
Hugo ndoqi një qasje plotësisht vegane, duke përdorur suplemente me bazë bimore dhe alga deti, përfshirë omega-3 nga burime vegjetale. Ndërkohë, Ross zgjodhi suplementet klasike me origjinë shtazore, si omega-3 nga vaji i peshkut. Të dy ndoqën një program identik ushtrimesh dhe iu nënshtruan rregullisht analizave të gjakut për të monitoruar ndryshimet në nivelet e lëndëve ushqyese.
Në përfundim të studimit, analizat treguan se dieta vegane kishte sjellë përfitime të qarta për Hugo-n. Ai shfaqi nivele më të larta të acideve yndyrore omega-3 dhe vitaminës D3, krahasuar me vëllain e tij. Ky rezultat është veçanërisht befasues duke qenë se omega-3 tradicionalisht mendohet se merret më lehtë nga burimet shtazore.
Studimi i tyre ka nxitur një debat të ri mbi efektet e dietave vegane, në një kohë kur gjithnjë e më shumë njerëz po i drejtohen ushqyerjes me bazë bimore. Megjithatë, ekspertët theksojnë se ndonëse rezultatet janë premtuese, ndikimet afatgjata të dietave vegjetariane mbeten ende për t’u kuptuar plotësisht.
