Këngëtarja Bleona Qereti ka depozituar një padi kundër aktivistes Evi Kokalari në Gjykatën e Lartë të Nju Jorkut, Konteja Queens, përmes Studios Avokatore Waymaker LLC. Padia është ngritur më 15 gusht 2025 dhe parashikon një kërkesë për 2 milionë dollarë dëmshpërblim.
Sipas dokumenteve të paraqitura në gjykatë, Bleona Qereti pretendon se Evi Kokalari ka zhvilluar prej vitit 2022 një fushatë të organizuar shpifjesh dhe dezinformimi kundër saj, duke fabrikuar narrativa të rreme me synimin për ta dëmtuar në aspektin profesional dhe personal.
Veprimet e Kokalarit, sipas padisë, kanë qenë të qëllimshme dhe dashakeqe ndaj Qeretit duke i shkaktuar dëme të pariparueshme në reputacion dhe imazh publik, si në SHBA ashtu edhe në Shqipëri.
Në dokumentacionin gjyqësor përmendet gjithashtu se marrëdhënia mes dy palëve nisi në vitin 2020, kur Kokalari u njoh me Qeretin dhe përmes kësaj miqësie arriti të përfitonte akses në rrethe mediatike dhe politike, duke e përdorur këtë ekspozim për ambiciet e saj personale.
Por në vitin 2022, pas ndërprerjes së marrëdhënieve, Kokalari sipas padisë së ngrituar nga Qereti nisi një fushatë hakmarrëse përmes deklaratave publike, postimeve në rrjete sociale dhe interpretimeve dashakeqe të materialeve artistike të këngëtares.
Bleona kërkon nga gjykata jo vetëm dëmshpërblimin financiar, por edhe ndalimin e çdo veprimi të mëtejshëm denigrues që, sipas saj, ka dëmtuar në mënyrë të konsiderueshme karrierën dhe imazhin e saj publik./Versus.al
