Cristiano Ronaldo është bërë lojtari i parë në histori që shënon 100 gola zyrtarë për katër klube të ndryshme, megjithatë skuadra e tij Al Nassr humbi finalen e Superkupës së Arabisë Saudite ndaj Al-Ahli, pas një barazimi 2-2 dhe një disfate në gjuajtjet e penalltive.
Goli i shënuar nga Ronaldo në pjesën e parë, në Stadiumin e Hong Kongut, e çoi 40-vjeçarin në 100 gola për klubin saudit, të cilit iu bashkua në dhjetor të vitit 2022. Kësaj arritjeje i shtohen 450 gola me Real Madridin, 145 me Manchester United dhe 101 me Juventusin. Me këtë rekord, Ronaldo lë pas tre lojtarë që kishin shënuar 100 gola për tre klube të ndryshme: Isidro Langara (Spanjë, 1930–1948), si dhe legjendat braziliane Romario dhe Neymar.
Ronaldo, i cili ende nuk ka fituar një trofe madhor në Arabinë Saudite, është gjithashtu golashënuesi më i mirë në historinë e kombëtareve, me 138 gola për Portugalinë. Në këtë finale, ai kaloi Al Nassr në avantazh në minutën e 41-të me një gjuajtje nga penalltia, por Franck Kessie barazoi menjëherë për Al-Ahli.
Kur kishin mbetur vetëm shtatë minuta nga fundi i kohës së rregullt, Marcelo Brozovic riktheu avantazhin për Al Nassr, por mbrojtësi brazilian Ibanez shënoi me kokë pas një goditjeje këndi, duke e çuar ndeshjen në penallti.
Ronaldo realizoi sërish nga pika e bardhë, por bashkëlojtari i tij Abdullah al-Khaibari dështoi, dhe Al-Ahli fitoi 5-3, duke ngritur trofeun e parë të sezonit në futbollin saudit.
