Një skandal ka ndodhur mbrëmë gjatë ndeshjes mes Rumanisë dhe Kosovës që po luhej në Bukuresht. Gjatë gjithë ndeshjes, lojtarët e Kosovës u përballën me thirrje raciste nga ana e tifozerisë kundërshtare.
Gjithashtu një prej thirrjeve më të shpeshta ishte “Kosova është Serbi” nga tifozë të cilët hidhnin edhe sende në fushën e lojës.
Kjo solli reagimin e lojtarëve të Kosovës të cilët të prirë nga kapiteni Amir Rrahmani lanë fushën në minutën e 90-të për shkak të thirrjeve anti-Kosovë. Ndeshja po mbyllej me rezultatin 0-0 ndërsa lojtarët dardanë nuk pranuan të riktheheshin më në fushë. Në konferencë për mediat Amir Rrahmani tha se nuk mund të lejoheshin thirrje të tilla kur dihet çfarë gjenocidi është kryer nga serbët në Kosovë.
“UEFA duhet të vendosë sepse jemi futbollistë, jemi për të përfaqësuar këtu popullin tonë, shtetin tonë që ka të kaluar të rëndë. Një luftë e madhe ka marrë jetën e njerëzve, ka pasur masakra. Kjo është e tepërt. Ndaluni. Të gjithë duhet ta dinë se Kosova është Kosovë ose Kosova është Shqipëri. Kaq. Këtu mbaron”- u shpreh kapiteni i Kosovës.
Ndërsa trajneri rumun, Mircea Lucescu e ka vlerësuar të turpshëm vendimin e Kosovës për ta braktisur ndeshjen Sipas tij nuk ka pasur pankarta, e as thirrje, ndërsa Lucescu shtoi se gjyqtari nuk i ka lejuar të dalin nga fusha.
“E turpshme. Ata ishin të turpshëm për shkak të sjelljes së tyre joprofesionale. Ata nuk janë lejuar të largohen nga fusha. Është diçka e pazakontë”.
Mbetet të shihet çfarë do të vendosë UEFA për rastin e rëndë. Versus.al
