Kryetari i Partisë Demokratike, Sali Berisha, ka komentuar raportin e fundit të institucioneve europiane për Shqipërinë, duke deklaruar se dokumenti evidenton rritjen e korrupsionit dhe mbrojtjen politike ndaj aferave të qeverisë.
Gjatë deklaratës së tij, Berisha u ndal te zëvendëskryeministrja Belinda Balluku, për të cilën tha se vijon të ushtrojë pushtet të plotë në qeveri, ndërsa sipas tij raporti i BE kërkon heqjen e imunitetit “pa asnjë pengesë dhe me përparësi”.
Sipas liderit të opozitës, raporti evidenton gjithashtu rënien e Shqipërisë në indeksin e korrupsionit dhe kritikon mënyrën se si, sipas tij, qeveria ka mbrojtur zyrtarët e përfshirë në aferat e AKSHI-t.
Berisha deklaroi se dokumenti ngre shqetësime edhe për mungesën e rolit të Parlamentit në procesin e integrimit europian, ndërsa akuzoi kryeministrin Edi Rama se ka fshehur procese të rëndësishme që lidhen me BE-në.
Kreu i PD u ndal edhe te iniciativa “Ballkani i Hapur”, duke thënë se raporti europian e dënon atë, si edhe bashkëpunimin Rama-Vuçiç, duke e konsideruar një përpjekje që, sipas tij, ka dëmtuar procesin e integrimit të Shqipërisë në Bashkimin Europian.
