Tiranë- Sot është dita e dytë e vizitës së 10 eurodeputetëve të Parlamentit Europian në Shqipëri në kuadër të takimit të 18-të sa i takon Stabilizim-Asocimit për negociatat në BE.
Fokusi i takimit do të përqendrohet në të njëjtat tema si ato të djeshmet, konkretisht: sundimi i ligjit, lufta kundër krimit dhe korrupsionit, liria e medias dhe zgjedhjet, zhvillimi Ekonomik dhe Turizmi si dhe marrëdhëniet e fqinjësisë së mirë dhe bashkëpunimi rajonal.
Me hyrjen në fuqi të marrëveshjes së Stabilizim-Asociimit, dialogu politik mes Shqipërisë dhe Bashkimit Europian do të zhvillohet në kuadër të strukturave të përbashkëta të komitetit dhe nënkomisioneve. Ky këshill i Stabilizim Asociimit mblidhet një herë në vit për të kryer vlerësimin e përgjithshëm të zbatimit të marrëveshjes, duke shqyrtuar çdo çështje të rëndësishme që lind në zbatimin e saj.
Dje u mbajt takimi i parë në kuadër të kësaj marrëveshje, ku morën pjesë parlamentarët shqiptarë të drejtuar nga socialisti Toni Gogu dhe Marco Tarquinio, kryetar i delegacionit të PE. Pjesë e delegacionit me 10 eurodeputetë, është edhe Fredi Beleri, i cili në qershor të këtij viti teksa vuante dënimin në burgun e Fierit për blerje votash në Himarë ku u zgjodh edhe kryebashkiak, u votua nga qytetarët grekë për t’i përfaqësuar ata në PE nën siglën e partisë së Mitsotakis “Demokracia e Re”.
Takimi i eurodeputetëve me kryeministrin Edi Rama u prit me shumë interes për shkak edhe të përplasjeve që ky i fundit ka pasur me Fredi Belerin kur kandidonte për kryebashkiak të Himarës. Por ndryshe nga sa pritej, kryeministri nuk u takua me ta në kryeministri por i vizitoi në hotelin ku ishin akomoduar në Tiranë, pa praninë e kamerave. Pjesë e takimeve në Kuvend, ishin edhe deputetët e opozitës me në krye Gazment Bardhin. Gjatë takimit që patën me eurodeputetët, opozitarë i informuan mbi situatën politike në vend dhe veprimet e ndërmarra nga ana e opozitës.
Ndërsa pas takimit të parë të zhvilluar dje në Kuvendin e Shqipërisë, Fredi Beleri u qëllua me vezë nga një qytetar në Tiranë i cili e akuzonte atë për masakrën e Peshkëpisë. Versus.al
