Ambasadori i Bashkimit Europian, Silvio Gonzato ka kritikuar zhvillimet e fundit dhe kaosin e krijuar në seanca plenare nga ana e deputetëve të Partisë Demokratike të cilët dogjën karriget pas dënimit dhe arrestimit të deputetit Ervin Salianji.
Në një deklaratë për mediat, Gonzato tha se ka mënyra të tjera me anë të të cilave opozita mund të shprehë shqetësimet që ka lidhur me nivelin e demokracisë në vend.
“Kuvendi duhet të funksionojë siç duhet në këtë fazë të procesit të integrimit ku gjendet Shqipëria. Djegia e karrigeve nuk është efikase. Opozita ka mënyra të tjera për të denoncuar mungesën e demokraricë”- tha ambasadori.
I pyetur nga gazetarët për bojkotin e institucioneve të drejtësisë ndaj komisionit të posaçëm Antikorrupsion të drejtuar nga Fatmir Xhafaj, Gonzato tha se është në të drejtën e tyre dhe se duhet të respektohet pavarësia e këtyre organeve.
Më herët, sa i takon qëndrimit të ndërkombëtarëve lidhur me aksionin e opozitës, kryedemokrati Sali Berisha tha në një deklaratë për mediat se shumë diplomatë nuk janë të mirëinformuar për situatën ku gjendet vendi dhe se duhet të bëhen hapa më domethënës në informimin e tyre mbi kërcënimin e demokracisë në vend. Versus.al
