Masakra me tre të vrarë dhe 1 të plagosur në Dobraç të Shkodrës ka ngritur në alarm jo vetëm policinë e shtetit, por edhe partitë politike. Së fundmi, kreu i Lëvizjes për Zhvillim Kombëtar, Dashamir Shehi në një deklaratë për mediat e ka cilësuar gjendjen e kriminalitetit si të përkeqësuar duke theksuar se bandat kriminale nuk janë të frikësuara nga shteti. Ai shtoi se qeveria aktuale është palë me bandat.
“Lëvizja për Zhvillim Kombëtar, iu shpreh ngushëllime familjeve të viktimave. Por, jo më larg se tre muaj më parë, LZHK, tërhoqi vëmendjen e opinionit publik përmes një deklarate për mediat se aktualisht në Shqipëri, gjendja e kriminalitetit, jo vetëm që nuk është përmirësuar, por është përkeqësuar dhe se shkaku kryesor i kësaj gjendjeje është se krimi nuk ka frikë nga shteti. Qeveria aktuale, jo vetëm që nuk e ka vullnetin për të luftuar krimin, por është bërë palë me të si në të gjithë Shqipërinë, edhe në Shkodër, sikurse e tregoi më herët edhe "Metamorfoza", thuhet në deklaratë.
Sipas Dashamir Shehit duhet që të krijohet “Xhandamëria Kombëtare” në mënyrë që të garantohet siguria publike duke marrë si shembull ekzistencën e kësaj njësie gjatë sundimit të Mbretit Zog, ku sipas tij ka pasur një gjendje qetësie ne vend.
“Krijimin e Xhandarmërisë Kombëtare, si një forcë elitare e specializuar dhe e afirmuar në shumë shtete për garantimin e sigurisë publike. Për më tepër akoma, është pikërisht Shqipëria, e cila periudhën më të artë të qetësisë së saj publike e ka gëzuar kur ngriti, forcoi, pajisi dhe përdori Xhandarmërinë në vitet e Mbretërisë Shqiptare nën drejtimin e Mbretit Zog. Është fakt historik i gjithëpranuar se rendi publik i atyre viteve përbënte një nga vlerat më themelore të atij shteti”- thuhet në deklaratë.
LZHK shprehu besimin se “Xhandarmëria Kombëtare e krijuar sipas alternativës së tyre, do të zhvillojë me sukses luftën kundër krimit; do të garantojë rendin dhe sigurinë publike; do bëjë ndërhyrjen në operacionet kundër Akteve Terroriste; do të mbështesë Forcat e Armatosura në raste të operacioneve ushtarake dhe të tjera”. Versus.al
