Parlamenti Europian ka rrëzuar amendamentin që lidhej me zhvillimet në zonat e Sazanit dhe Zvërnecit, duke miratuar me shumicë dërrmuese rezolutën për Shqipërinë pa përfshirjen e këtij ndryshimi.
Pas votimit, kryeministri Edi Rama reagoi përmes një postimi në rrjetet sociale, ku e konsideroi vendimin si një konfirmim të qëndrimit të qeverisë lidhur me debatet e fundit për zonën e mbrojtur Vjosë-Nartë dhe projektet e zhvillimit në Zvërnec.
Sipas Ramës, Parlamenti Europian ka ndarë faktet nga, sipas tij, “stuhia e dezinformimit” që ka shoqëruar protestat e javëve të fundit.
“Ja edhe Parlamenti Europian e ndau ‘shapin’ e stuhisë digjitale të dizinformimit nga ‘sheqeri’ i zonës së mbrojtur Vjosë-Nartë, e cila nuk ka asnjë lidhje me zhvillimin që europarlamentarët e rrëzuar me votën e shumicës dërrmuese, futën qorrazi si amendament të Rezolutës për Shqipërinë”, shkroi Rama.
Kreu i qeverisë hodhi poshtë pretendimet e ngritura nga kundërshtarët e projektit dhe protestuesit, duke deklaruar se ose Europa është “çmendur dhe korruptuar”, ose ka diçka që nuk shkon me ata që, sipas tij, e nisën protestën në emër të mbrojtjes së mjedisit.
“Tani o është çmendur dhe korruptuar krejt Europa, që përmes Parlamentit të saj e vlerëson lart Shqipërinë dhe nxit anëtarësimin tonë sa më parë në BE, o ka diçka që nuk shkon me ata që e nisën protestën e javëve të fundit me mbrojtjen e flamingove dhe po e bitisin si luftë për pushtet në emër të flamingove”, u shpreh Rama.Versus.al
