Deputetja e Partisë Demokratike, Dhurata Çupi i është drejtuar me anë të një kërkese zyrtare institucioneve në vend lidhur me dyshimet se në Shqipëri mund të jetë duke u përdorur pajisja DPI për bllokimin e aksesit të aplikacionit TikTok.
Në kërkesë thuhet se teknologjia në fjalë përdoret vetëm në vendet jo demokratike si Rusia, Bjellorusia dhe Kina për të bllokuar aksesin në internet.
Deputetja thekson se “DPI (Deep Packet Inspection) mund të marrë padrejtësisht të dhënat e qytetarëve nga celularët smartphone, tabletat, kompjuterat apo pajisjet e tjera të cilat përdorin internet.
Kërkesë për informacion lidhur me përdorimin e Deep Packet në Shqipëri
Drejtuar:
Autoritetit të Komunikimeve elektronike dhe postare (AKEP)
Komisionerit për të Drejtën e Informimit dhe Mbrojtjes së të Dhënave
Autoriteti i Mediave Audiovizive (AMA)
Agjencia Kombëtare për Shoqërinë e Informacionit (AKSHI)
Autoriteti Kombëtar për Sigurinë Kibernetike
Për dijeni Avokatit të Popullit
Drejtoria e Inteligjencës financiare (DIF)
Drejtoria për Sigurinë Kibernetike në Ministrinë e Brendshme
Jemi vënë në dijeni të faktit se pas mbylljes së platformës TikTok, në Shqipëri mendohet të përdoret teknologjia e quajtur DPI (Deep Packet Inspection) pa asnjë kuadër ligjor, transparencë dhe konsultim publik paraprak. Kjo teknologji mësohet se përdoret me qëllim detektimin e VPN dhe bllokimin e aksesit në website të caktuara, duke kanalizuar fluksin e komunikimeve dhe filtruar, penguar apo marrë padrejtësisht të dhënat e qytetarëve nga celularët smartphone, tabletat, kompjuterat apo pajisjet e tjera të cilat përdorin internet.
Me një kërkim të thjeshtë mësohet se kjo teknologji përdoret rëndom në vendet jodemokratike si Rusia, Bjellorusia dhe Kina të cilat nuk kanë asgjë të përbashkët me demokracitë e vendeve perëndimore apo me ato të Bashkimit Europian. Ndaj, për të sqaruar këtë situatë tepër shqetësuese në mbështetje të nenit 8 e vijues të ligjit nr.8550 datë 18.11.1999 “Për statusin e deputetit”, të ndryshuar, në cilësinë e deputetes së Kuvendit, ju kërkoj vënien në dispozicion të informacionit si më poshtë:
A është përdorur në të shkuarën ose a është duke u përdorur teknologjia Deep Packet Inspection (DPI) në territorin e Republikës së Shqipërisë?
A është përdorur teknologjia Deep Packet Inspection (DPI) për të identifikuar dhe kufizuar aksesin e përdoruesve në TikTok ose në aplikacione të tjera?
Nësepo, cilat janë bazat ligjore dhe procedurat zyrtare mbi të cilat është mbështetur vendimmarrja për përdorimin e kësaj teknologjie në territorin e Republikës së Shqipërisë?
A ka ndonjë vlerësim të ndikimit në privatësi (DPIA) të realizuar përpara aplikimit të kësaj teknologjie dhe a është përfshirë komisioneri për të drejtën e Informimit dhe Mbrojtjen e të Dhënave Personale në këtë proces?
A është njoftuar publiku ose ndonjë autoritet tjetër ndërkombëtar për përdorimin e kësaj teknologjie dhe a mund të cenojë të drejtat themelore të privatësisë dhe lirisë së shprehjes?
A janë kontaktuar përfaqësuesit e TikTok për këtë çështje dhe çfarë kërkesash i janë adresuar asaj?
A janë përcaktuar kushte të qarta, afate dhe masa pasuese në rast të mosplotësimit të kushteve nga ana e TikTok? Cili ka qenë reagimi zyrtar i TikTok ndaj këtyre kërkesave?
Nëse nuk është përdorur DPI, atëherë me cilat metoda teknike është realizuar bllokimi i aksesit në TikTok nga operatorët e rrjeteve elektronike?
Kërkojmë që informacioni i kërkuar të na vihet në dispozicion të plotë brenda afatit ligjor prej 15 ditësh.
Duke ju falenderoi
Deputete
Dhurata Çupi (Tyli)/Versus.al
