Kryeministri Edi Rama ka reaguar sot në rrjetet sociale për operacionin e zhvilluar në Durrës, ku Policia e Shtetit shembi resortin e ish-kreut të IMT-së Durrës, Ardian Halilit tashmë të arrestuar.
Rama shkruan në postimin e tij se zërat në nisje të ndërtimeve të paligjshme të cilën ai e quan kthesë të re thoshin, “po pse Thethi e jo Jugu, po pse ashtu e jo kështu”, ndërkohë që puna sipas kryeministrit për mbrojten nga abuzuesit vazhdon nga veriu në jug.
Kryeministri shton më tej në postim se konkretisht në Durrës është vendosur rendi ligjor mbi një territor të marrë peng duke e quajtur ish-kreun e IMT-së abuzues.
Postim i kryeministrit Edi Rama:
Ca zëra në nisje të kësaj kthese të re thoshin “po pse Thethi e jo Jugu, po pse ashtu e jo kështu”, ndërkohë puna për mbrojtjen e vendit nga abuzuesit vazhdon në Veri, Jug dhe Shqipërinë e Mesme, ku konkretisht në Durrës është vendosur rendi ligjor mbi një territor të marrë peng nga një abuzues, i cili është ndaluar nga Policia e Shtetit e i është dorëzuar drejtësisë edhe si ish-drejtues i inspektorëve të Durrësit.
Ditën e djeshme forcat xheniere shemben me shpërthim të kontrolluar godinën 2-katëshe të resortit në zonën e Shetajt, Ishëm që ishte në pronësi të Ardian Halilit.
I njohur si “Restorant Saint Michelle Camping Hotel”, resorti kishte 11 kabina tip garsionere, një godinë 2 katëshe, një fushë mini-futbolli, pishinë në një sipërfaqe toke 5.600 m2 i ndërtuar pa leje gjatë kohës kur Ardian Halili ka ushtruar funksionin e Kryeinspektorit të IMT-së në Bashkinë Durrës, deri në vitin 2021./Versus.al
