Tiranë- Presidentja e Komisionit Europian, Ursula von der Leyen, e cila sapo ka marrë mandatin e radhës në krye të institucionit ekzekutiv të BE, mbërrin në Shqipëri ditën e sotme.
Pritet që menjëherë pas mbërritjes në Tiranë, Von Der Leyen të zhvillojë një takim me kryeministrin Edi Rama në orën 15:00. Më pas do të ketë një konferencë të përbashkët për shtyp mes saj dhe kreut të qeverisë shqiptare.
Rreth orës 17:00, Rama dhe Ursula Von Der Leyen do të marrin pjesë edhe në ceremoninë e hapjes së Kolegjit të Europës në Tiranë.
Ndërkohë, ditën e sotme në Strasburg ku zhvillohet seanca plenare e eurodeputetëve, deputetët demokratë kanë planifikuar një protestë ku synojnë që të informojnë zyrtarët e BE lidhur me arrestimet e krerëve të opozitës në Shqipëri dhe mbi zhvillimet të cilat ata i cilësojnë si “shqetësuese” sa i takon përqendrimit të pushtetit në duart e kryeministrit Edi Rama dhe injorimin e vendimeve të dhëna nga Gjykata Kushtetuese. Versus.al
