Albana Vokshi kryetarja e komisionit hetimor për koncesionet në Shëndetësi, “Sterilizimin” dhe “Check Up”-in, ka kërkuar që afati për mbylljen e punimeve të këtij komisioni të shtyhet deri në 3 javë për shkak të mungesës së ecurisë në pyetjen e dëshmitarëve gjë e cila sipas saj është shkaktuar nga pengimi i deputetëve të opozitës për të qenë në mbledhje.
Për pasojë, Vokshi ka paralajmëruar një kallëzim penal për kreun e Gardës nën akuzën e pengimit të funksionarëve publikë, pavarësisht se deputetët rezultojnë të përjashtuar për shkak të kaosit të shkaktuar në seancën e 30 shtatorit, ku u lexua shkresa e arrestimit të deputetit Ervin Salianji.
“Nuk doni të dalin korrupsionet e Ilir Beqajt dhe Ogerta Manastirliut dhe Edi Ramës që ka dhënë urdhrin. Kemi ardhur këtu sepse interesi publik për zbardhjen e këtyre abuzimeve qindra miliona eurove, prek qytetarët.
Është e paimagjinueshme kjo që po ndodh në këtë komision, e keni futur në shinat e paligjshmërisë. Mos mendoni se duke e rrëmbyer komisionin, do i fshihni këto abuzime me vlerë qindra miliona euro, kur këtu nuk bëhen analiza e nuk bëhen operacione.
Unë jam këtu në emër të deputetëve që sot duhet të ishin këtu me ne, por u ndaluan në mënyrë të dhunshme nga Garda. Duke qenë se e kemi të përcaktuar afatin e komisionit, kërkojmë që 5 deputetë të përjashtuar (të dënuar) të jenë këtu prezentë. Kemi bërë kërkesë për përjashtimin e deputetëve dhunues në këtë komision. Kemi ngritur edhe kallëzim penal për këdo që ka penguar vijimin normal të këtij komisioni. Ne kërkojmë kthimin në ligjshmëri të komisionit duke lejuar praninë e 5 deputetëve të përjashtuar”- u shpreh mes të tjerash Vokshi e cila ka kërkuar edhe masë ndëshkimore ndaj 3 deputetëve socialistë Erion Braçe, Plarent Ndreca dhe Ilir Metajn me të cilët pati përplasje gjatë mbledhjes së kaluar.
Demokratja kërkoi mbylljen e mbledhjes, deri në një përgjigjie nga Sekretariati i Etikës për 5 deputetët anëtarë të cilët janë përjashtuar. Ndërsa ditë më parë pati përplasje të ashpra mes anëtarëve të komisionit, kur Vokshi i hodhi mikrofonin Ndrecës, ndërsa deputeti socialist Ilir Metaj ka kërkuar me ironi një ambulancë për demokraten duke iu referuar gjendjes së saj të rënduar emocionale. Versus.al
