Në vijim të fushatës elektorale për zgjedhjet parlamentare të 11 majit, Kryeministri Edi Rama zhvilloi sot një takim me qytetarët në Lezhë, ku vijoi tonet e ashpra ndaj opozitës dhe veçanërisht Partisë Demokratike.
Duke mos kursyer ironinë dhe satirën, Rama e cilësoi sërish PD-në si një “kënetë”, ndërsa liderin e saj, Sali Berisha, e quajti “bufin e kënetës”.
“Unë nuk i bullizoj, satira dhe karikatura janë format më të larta të kritikës. Satira është e dhimbshme. Nuk e ka fajin ai që bën satirën, pyet veten pse të dhemb”, deklaroi kreu i qeverisë, duke iu referuar reagimeve nga opozita.
Ai vijoi me analogjinë duke thënë: “E fusin bufin në hije tani dhe të tjerët rrinë në diell. Siç mblidhen bretkosat gërr-gërr në kënetë, ashtu dhe ata.”
Rama theksoi se vota e 11 majit do të jetë një mundësi për të forcuar vijimësinë e projekteve të zhvillimit dhe për të shmangur, sipas tij, rikthimin në “batakun e së kaluarës”.
