Tiranë- Socialistët dhe demokratët patën një konsensus në mbledhjen e parë të komisionit hetimor të Shëndetësisë për koncesionin e Sterilizimit dhe Check Up. Pas zgjatjes së afateve të komisionit, për tre muaj të tjerë, sot palët ranë dakord për shkresat e informacioneve dhe listën e re të dëshmitarëve që do të thirren në komision.
Në total, do të thirren për të dëshmuar 39 persona, mes tyre edhe ish-ministri i Shëndetësisë, Ilir Beqaj (i arrestuar) dhe 8 persona të tjerë nën hetim për çështjen e kontratave të Sterilizimit dhe Check Up-it.
Për thirrjen e tyre, komisioni do të kërkojë leje nga prokuroria. Pritet që në komision të thirren si dëshmitarë të gjithë ish-drejtorët e QSUT që kanë shërbyer që prej zbatimit të koncesionit të Check Up në 2015-ën, mes tyre edhe drejtoresha aktuale e institucionit, Alma Cani.
Po ashtu, do të dëshmojnë në komision, edhe ish-drejtorë të spitaleve rajonale të Durrësit, Shkodrës, Elbasanit, Vlorës.
Vendimi për zgjatjen e afateve të komisionit hetimor për koncesionet në Shëndetësi, u mor më 25 korrik ku i vetmi deputet që votoi kundër, ishte socialisti Erion Braçe. Versus.al
