Tiranë-Seanca paraprake për dosjen e koncesionit të “Sterilizimit” në Shëndetësi për të cilën mes të pandehurve është edhe ish-ministri Ilir Beqaj është shtyrë për në 12 shtator.
Kjo është hera e katërt që seanca shtyhet, ndërsa mësohet se shkak është bërë mungesa e njërit prej avokatëve. Shtyrja e seancës ka bërë që masat e caktuara ndaj të pandehurve të pezullohen aktualisht.
Ndërsa ish-ministri i Shëndetësisë, Ilir Beqaj gjatë seancës në GJKKO ku u shoqërua si i arrestuar për abuzimin me fondet e dhëna nga BE të menaxhuara nga agjencia “SASPAC” të cilën e drejtonte prej një viti, tha se në këtë dosje ka gjëra të pavërteta ndaj tij, duke ndjekur të njëjtën linjë të avokatit të tij Ermal Yzeiraj i cili deklaroi se SPAK e ka personale me Ilir Beqajt pasi sipas tij po përpiqet të zbehë dështimin në çështjet e tjera hetimore.
Beqaj është nën masën “detyrim paraqitje” lidhur me çështjen e Sterilizimit pasi akuzohet për “shpërdorim detyre”. Ai është zyrtari më i lartë nën akuzë për shkeljet e konstatuara me kontratën e partneritetit publik-privat të sterizilimit, ndërsa në gusht të vitit të kaluar, u arrestuan biznesmeni Ilir Rrapaj dhe ish-zv.ministri i Shëndetësisë, Klodian Rrjepaj. Versus.al
