Tiranë- Gjykata ka vendosur lirimin nga qelia të dy protestuesve të opozitës të cilët u arrestuan më 8 tetor nën akuzën e shkatërrimit të pronës me zjarr dhe goditjes së efektivëve të policisë.
Mësohet se për Xhevahir Rrushin dhe Gentjan Tugën është caktuar masa e arrestit shtëpiak. Ndërkohë që 6 protestues të tjerë po hetohen në gjendje të lirë.
Gjithashtu, nën procedim janë edhe sekretari i Përgjithshëm Flamur Noka dhe kreu i grupit parlamentar Gazment Bardhi, të dy për organizimin e protestës që nisi si marshim duke bllokuar disa rrugë të kryeqytetit dhe vijoi me hedhjen e molotovëve në institucionet kryesore të vendit.
Protesta e 7 tetorit, u konsiderua si nisje e mosbindjes civile nga ana e demokratëve të cilët kanë paralajmëruar se aksionet e dhunshme të ngjashme me protestën ku nuk u mbajtën fjalime politike, do të zgjerohen edhe në qytete të tjera të vendit.
Duke u shprehur i vendosur për krijimin e qeverisë teknike, kryedemokrati Sali Berisha ka paralajmëruar kryeministrin Edi Rama se mosbindja civile do të shtrihet në qytete të ndryshme të vendit, derisa ky i fundit të reflektojë për krijimin e një qeverie teknike. Aksioni i dhunshëm i opozitës u përshkallëzua me dënimin dhe burgosjen e deputetit Ervin Salianji për dosjen Babale. Dhuna është shtrirë edhe në Kuvend ku pas sendeve të forta të hedhura ndaj ministrave e djegies së karrigeve, sekretriati i Etikës mori vendim për të përjashtuar nga sencat plenare 24 deputetë demokratë. Versus.al
