Fier- Detaje të reja janë mësuar rreth ngjarjes së ndodhur mes fqinjve në Ballsh, ku një i moshuar i identifikuar si Agur Beqiraj plagosi me thikë dy vëllezërit Elis dhe Juli Pashaj. Për pasojë të tre përfunduan nën pranga, Beqiraj për plagosjen dhe dy vëllezërit të cilët fshehën ngjarjen duke e raportuar si konflikt mes tyre.
Por sipas të dhënave të tjera të bëra me dije, e gjitha ka ndodhur si pasojë e tentativës së njërit prej vëllezërve për të hyrë në banesën e të moshuarit. Familja e dy vëllezërve jeton në katin e parë të një pallati në lagjen “28 nëntori”, ndërsa familja e të moshuarit, në katin e dytë.
Sipas Report Tv, 26 vjeçari Juli Pashaj është futur gjatë natës në banesën e të moshuarit. Ky i fundit ka pikasur të riun dhe është përplasur fizikiht me të. Pasi dëgjoi zhurmat e përplasjes, vëllai tjetër ka shkuar në ndihmë të 26 vjeçarit dhe të dy kanë mbetur të plagosur me thikë. 75 vjeçari jetonte në banesë me bashkëshorten e tij, nusen e djalit dhe 2 fëmijët e saj ndërsa djalin e ka emigrant në Greqi. Fqinjët kanë pohuar paraprakisht se shkak është bërë ngacmimi i nuses së djalit, por nuk përjashtojnë si mundësi edhe një tentativë vjedhje.
Të rinjtë u paraqitën në spitalin e Mallakastrës pas ngjarjes me plagë në pjesën e krahut dhe kokës. Para policisë e raportuan si përplasje mes njëri-tjetrit me qëllim fshehjen e ngjarjes, por hetimet zbuluan të gjithë rjedhën e situatës. Versus.al
