E shtuna përgjaket edhe në Pogradec. Në lagjen nr.1 të qytetit juglindor mësohet se është plagosur 23 vjeçari Nikolla Agolli, pasi është konfliktuar për motive të dobëta me një shtetas të identifikuar tashmë nga policia si Sindi Syzo.
Si pasojë e konfliktit 23 vjeçari është dëmtuar me një mjet prerës, i cili pas ndihmës mjekësore është paraqitur në Komisariat dhe ka bërë kallëzim.
Burimet policore bëjnë me dije se autori Sindi Syzo është futur në berberanë ku ka gjetur të dëmtuarin Nikola Agolli, i cili ka qenë duke u qethur. Me një mjet prerës ai e ka sulmuar menjëherë sapo ka hyrë në ambjentet e berberanës pa patur asnjë konflikt mes njëri tjetrit.
Sindi Syzo është larguar me njëherë nga vendngjarja ku është shpallur edhe në kërkim nga policia, ndërsa gjendja e Nikola Agollit është jashtë rrezikut për jetën pasi ka pësuar disa çarje në kokë dhe krah. Mësohet se Sindi Syzo është një person problematik që njihet edhe nga policia e Pogradecit, ndërsa mbeten të paqarta rrethanat e sulmit ndaj Agollit.
Grupi hetimor nën drejtimin e Prokurorisë dhe shërbimet e Policisë janë vënë në ndjekje të autorit dhe vijojnë kontrollet për kapjen e tij dhe zbardhjen e rrethanave të ngjarjes.
