Itali- Prokuroria italiane e Brescias ka mbyllur hetimet për çështjen e trafikut ndërkombëtar të drogës në kuadër të operacioneve të kryera nga vitit 2020 deri në vitin 2024 pas zbërthimit të përgjimeve në “Sky Ecc” ku shfaqeshin planet e organizatës kriminale me qendër në Shqipëri për të trafikuar drogë nga Amerika Latine drejt Europës.
Në total janë lëshuar 61 urdhër arreste, nga të cilat janë zbatuar deri më tani 21 prej tyre. Gjatë kontrolleve të zhvilluara në bazat kriminale dhe banesat e anëtarëve të bandave të trafikut, u gjetën dhe sekuestruan rreth 2 milionë euro cash, 5 pistoleta e municione luftarake, 8 automjete luksoze si dhe 360 kg kokainë e cila nëse do të shitej në treg, kapte vlerën e 30 milionë eurove, shkruajnë mediat italiane.
Rreth 400 oficerë të Guardia di Finanzas po kryejnë hetime në Itali, Shqipëri, Zvicër dhe Poloni ku dyshohet se organizata kriminale ka investuar në krijimin e kompanive të cilat prisnin fatura fiktive me qëllim pastrimin e parave.
Bashkëpunimi mes bandave italo-shqiptare me shoqatën kineze për pastrimin e parave
Sipas hetimeve të prokurorisë italiane, grupi kriminal, qendrën e aktivitetit e kishte në Shqipëri nga ku drejtonin operacionet e trafikut të drogës që organizohej me detaje që para se lënda narkotike të ngarkohej në port nga vendet e Amerikës Latine.
Pasi mbërrinin në portet italiane, lënda narkotike ruhej në 5 baza logjistike në Lombardi, Brescia dhe Palazolo për t’u shpërndarë më pas në shtete të ndryshme. Ndërsa brenda këtyre bazave organizohej edhe grumbullimi i miliona eurove të përfituara nga trafiku i drogës, shumë që deri më tani përllogaritet t’i ketë kaluar qindra miliona euro.
Për pastrimin e këtyre parave dhe futjen e tyre në sistem, kujdesej një kompani kineze e cila dyshohet se ka pastruar rreth 375 milionë euro të organizatave kriminale duke u garantuar atyre edhe transportin fizik në dogana pa u kontrolluar nga policia e vendeve ku dërgoheshin.
Shpërndarja e drogës
Pasi organizohej me detaje në portet e vendeve të Amerikës Latine, droga mbërrinte në portet italiane nga ku më pas shpërndahej me kamionë në Spanjë dhe Holandë.
Për realizimin e këtij operacioni, autoritetet italiane kanë bashkëpunuar me Europol, autoritetet shqiptare dhe zviceriane. Versus.al
