Tiranë- Një sherr banal mes tre shokëve për pak sa nuk ka përfunduar në një tragjedi mbrëmjen e djeshme në Astir.
Policia njofton se rreth orës 22:50 përballë një pastiçerie në bulevardin e Kasharit në Unazë të Re ka pasur një sherr mes disa të rinjve për motive banale, ndërsa autori u largua nga vendngjarja.
“Më datë 19.09.2024, rreth orës 22:50, përballë një pastiçerie në bulevardin e Kasharit, në Unazë të Re, gjatë një konflikti për motive të dobëta janë plagosur dyshohet me mjete prerëse shtetasit E. D., 18 vjeç, dhe E. M., rreth 20 vjeç”- thuhet mes të tjerash në njoftim.
Informacione të tjera të siguruara bëjnë me dije se bëhet fjalë për një konflikt mes 3 shokëve të cilët kanë qenë duke konsumuar alkool e më pas janë përleshur me njëri tjetrin për arsye banale. Në momentin e konfliktit, 18 vjeçari Erdi Driza i cili mbeti i plagosur, ka qëlluar me shpullë shokun e tij Mandi Qori. Ky i fundit është larguar drejt banesës ku ka marrë një thikë dhe pasi është kthyer në lokalin ku kishte ndodhur sherri, e ka qëlluar adoleshentin 8 herë me thikë.
Gjatë këtij momenti, ka ndërhyrë edhe shoku tjetër, 20 vjeçari E.M i cili gjatë përpjekjes për të shuar konfliktin, është goditur me thikë në krah . Të dy të rinjtë ndodhen në spital, jashtë rrezikut për jetën.
Ndërkohë policia vijon me veprimet për kapjen e autorit që u largua nga vendngjarja. Versus.al
