Fier- Gjykata ka lënë në burg 17 vjeçarin e akuzuar për plagosjen me thikë të bashkëmoshatarit të tij në oborrin e shkollës së Çakranit. Në gjykatë ai tha se nuk është gjendje të flasë për krimin.
“S’jam në gjendje të flas, jam në ankth”- u shpreh i mituri.
Nxnësi i gjimnazit “Mustafa Hoxha” e qëlloi shokun e shkollës 4 herë me thikë. Aktualisht adoleshenti po merr ndihmë mjekësore në spital ku paraqitet jashtë rrezikut për jetën.
Por ngjarja e ndodhur vjen në një periudhë kur krime të tilla janë shtuar edhe duke pasur parasysh rritjen e agresivitetit në rrjetet sociale. Gjyshja e autorit foli për mediat duke pretenduar se nipi i saj kurohej me ilaçe për shkak të problemeve me shëndetin mendor dhe se prej disa ditësh nuk i kishte konsumuar.
Sipas saj, i plagosuri dhe disa persona të tjerë e kanë sulmuar fillimisht nipin e saj dhe më pas konflikti ka agravuar dhe 17 vjeçari i ka sulmuar. Nga ana tjetër babai i gjimnazistit të plagosur u shpreh se nuk ndihet më i sigurtë që ta çojë djalin në shkollë.
Në vend kanë ndodhur disa ngjarje tronditëse ku janë përfshirë në krime të mitur dhe adoleshentë. Që pas vrasjes së ndodhur 100 metra larg shkollës 9 vjeçare “Fan Noli” në Tiranë, janë rritur incidentet dhe krimet ku përfshihen persona të mitur.
Anëtarë të shoqërisë civile dhe prindër kanë bërë thirrje për protesta para institucioneve të cilave u bëjnë thirrje për të marrë masa të rrepta kundër këtyre ngjarjeve që vetëm janë shtuar në vend duke rritur pasigurinë në shkolla. Versus.al
