Vëllezërit Fatmir dhe Shkëlqim Matraxhi, 38 dhe 28 vjeç nga Kuksi, janë arrestuar nga policia për shkak të një operacioni të sofistikuar të kultivimit të kanabisit në shtëpinë e tyre në fshatin Laknas.
Sipas hetimeve, ata fillimisht mësuan teknikat e kultivimit të kanabisit në Angli, ku punuan për disa kohë, dhe më pas vendosën t’i transferonin njohuritë e fituara në Shqipëri.
Policia kishte dyshime për disa kohë se në shtëpinë e tyre po kryhej një veprimtari e paligjshme, derisa u bind për të ndërhyrë. Brenda shtëpisë, u zbulua një ambient i përshtatur posaçërisht për rritjen e kanabisit, i pajisur me llamba speciale, ventilatorë, pajisje kontrolli të temperaturës dhe filtra pastrimi të aromave për të mbuluar erën karakteristike të bimëve. Gjithashtu, u gjetën 20 rrënjë kanabisi në fazën e rritjes, me një lartësi prej rreth 60 cm, gati për të korrur.
Burime të policisë sugjerojnë se kjo mund të jetë faza e dytë e një operacioni më të gjerë, pasi dyshohet se një sasi e kanabisit të kultivuar më parë është shitur tashmë në treg. Përveç vëllezërve Matraxhi, në hetime është përfshirë edhe babai i tyre, Zitë Matraxhi, i cili po hetohet në gjendje të lirë për mosraportimin e veprimtarisë së paligjshme. Një tjetër i dyshuar është Endrit Paja, 29 vjeç, punonjës i OSHEE-së, i akuzuar për shpërdorim detyre, pasi dyshohet se ka lejuar lidhjen e paligjshme të energjisë elektrike për nevojat e këtij operacioni.
Shtëpia e vëllezërve Matraxhi konsiderohet një nga më të sofistikuarat e zbuluara deri tani nga autoritetet. Përveç pajisjeve standarde për kultivimin e kanabisit, u gjetën edhe 2 filtra pastrimi të aromave dhe një sistem me bokse muzikore, i cili ishte instaluar për të mbuluar zhurmën e aparaturave dhe për të shmangur dyshimet e fqinjëve dhe policisë.
Materialet e hetimeve janë dorëzuar prokurorisë për veprime të mëtejshme, ndërsa vëllezërit Matraxhi dhe Endrit Paja do të përballen me akuzat për kultivim dhe shpërdorim detyre./Versus.al
