Janë zbardhur disa nga dëshmitë e të arrestuarëve nga operacioni i gjërë policer në Fier, Tiranë, Dibër, Berat dhe Gramsh në lidhje me mashtrimet e skemave piramidale online.
Sipas burimeve për media agjentët e arrestuar kanë mohuar akuzat duke deklaruar se nuk kanë detyruar askënd të investojnë në platformat e përfshirë në hetime.
“Jemi njohur online dhe kemi vazhduar punën. Për të hyrë në skemë duhej të investohej minimalisht 1000 dollarë. Të parët që janë futur në këtë piramidë kanë mundur të përfitojnë fonde në kriptomonedha të cilat më pas i kanë konvertuar në Kosovë“, janë shprehur të arrestuarit.
Në një konferencë të përbashkët për shtyp ditën e djeshme zyrtarët e Policisë së Shtetit dhe Prokurorisë së Fierit bënë të ditur detajet e operacionit, i cili nisi si përgjigje ndaj shqetësimeve të qytetarëve për mashtrime online me premtime për fitime të menjëhershme dhe të sigurta investimi, që në të vërtetë ishin skema piramidale.
Gjatë 83 kontrolleve në banesa, biznese dhe persona, u vunë në pranga:
Arbër Çela, 38 vjeç, Lushnjë
Emanuel Taullau, 21 vjeç, Lushnjë
Flavio Mukaj, 23 vjeç, Lushnjë
Marius Kodra, 28 vjeç, Tiranë
Brunilda Todi, 38 vjeçe, Divjakë
Brunilda Ndini, 38 vjeçe, Divjakë
Ndërkohë në kërkim është shpallur çifti i bashkëshortëve, Alma Shebeku dhe Ereledio Shebeku, pasi dyshohet se kishin rolin kryesor në skemat piramidale.
Gjatë operacionit u sekuestruan:
50 celularë
11 kompjuterë
1 DVR dhe 2 hard disqe
1 automjet
4.2 milion lekë, 28 mijë euro, 1,750 dollarë dhe 340 franga zvicerane
6 llogari kriptomonedhash të ngrira
Falë teknologjisë së avancuar të analizës së blockchain-it dhe hetimeve të specializuara, autoritetet arritën të identifikojnë dhe ndalonin aktorët kyç të rrjetit, ndërsa hetimet për organizatorët kryesorë vijojnë./Versus.al
