Tiranë- Ndryshe nga protestuesit e tjerë të cilët dje u liruan nga qelia dhe u lanë në masën e arrestit shtëpiak, për Sokol Bushkolajn, protestuesin i cili hodhi lëndë plasëse molotov drejt policisë dhe gazetarëve gjykata caktoi masën “arrest me burg”.
Bushkolaj mësohet se ka qenë në arrest shtëpie më herët, por e ka thyer masën duke shkuar në protestë ku hodhi molotov drejt institucioneve, policisë dhe gazetarëve.
Ndaj Bushkolajt rëndojnë akuza për 3 vepra penale, konkretisht: thyerje e arrestit shtëpiak, shkatërrim prone me zjarr dhe goditje për shkak të detyrës. Ditën e djeshme, u liruan nga qelia dy prej protestuesve të arrestuar, Xhevahir Rrushi dhe Gentian Tuga të cilët u lanë në arrest shtëpie. Për protestën e cila u konsiderua “dita e parë e mobindjes civile”, janë proceduar penalisht edhe Flamur Noka e Gazment Bardhi si organizatorë të tubimit që përshkallëzoi në hedhjen e molotovëve që lanë të lënduar 10 policë. Versus.al
