Është vënë në pranga drejtuesi i mjetit, 55 vjeçari Ajet Lila pasi shkaktoi aksidentit mesditën e djeshme, në bypass-in e Rrugës së Arbrit.
Lila është vënë në pranga për veprat penale “Shkelja e rregullave të qarkullimit rrugor” dhe “Deklaratat e rreme përpara oficerit të policisë gjyqësore”.
Ai ka deklaruar para uniformave blu se një automjet tjetër i kishte ndërprerë rrugën dhe ishte bërë shkak për këtë aksident.
Por nga pamjet e marra nga vendi i ngjarjes mësohet se 55 vjeçari ka dhënë dëshmi të rreme para uniformave blu, dëshmi e cila çoi në arrestimin e tij.
Dyshohet se për shkak të humbjes së kontrollit, furgoni që drejtonte 55-vjeçari ka dalë nga rruga dhe si pasojë janë dëmtuar pasagjerët në këtë automjet.
Njëri nga të dëmtuarët vijon të jetë në kujdesin e mjekëve dhe jashtë rrezikut për jetën, ndërsa të tjerët pasi kanë marrë shërbimin mjekësor, janë larguar për në banesat e tyre.
