Admir Demiraj, babai i 20-vjeçarit Aron Demiraj, i cili u plagos paraditen e sotme në zonën e “Qytet Studentit” në Tiranë, ka folur për mediat, duke ndarë detaje mbi gjendjen shëndetësore të të birit dhe duke shprehur shqetësimin e tij për mungesën e sigurisë në vend.
Në deklaratën e tij, Demiraj konfirmoi se djali i tij është jashtë rrezikut për jetën, por theksoi se ngjarja ishte një goditje e papritur për familjen. Ai tregoi se Aron Demiraj, student në vitin e dytë për Inxhinieri Ekonomike, është një djalë i edukuar dhe nuk priste që një situatë e tillë të ndodhte.
“Unë e di çfarë djali kam rritur dhe edukuar, por sot të gjen e pabëra kot. Sot më ndodhi mua, nesër mund t’i ndodhë dikujt tjetër. Problemi më i madh është mungesa e sigurisë në vend,” tha ai, duke apeluar për masa më të forta për të parandaluar incidente të tilla.
Ngjarja nisi pas një konflikti banal midis Aronit dhe autorit të sulmit, 19-vjeçarit Ajdin Ajazi, për shkak të fjalëve: “Përse më bllokove rrugën, përse më sheh shtrembër.” Ndërkohë, babai i Aronit, i mallëngjyer pas takimit me të birin në spital, shprehu dhimbjen për situatën dhe keqardhjen për prindërit e autorit.
“Jam i tronditur. Nuk e prisja kurrë që të ndodhte një gjë e tillë. Duhet bërë më shumë për sigurinë e të rinjve tanë,” përfundoi ai.
