Ishte padyshim një sfidë spektakolare, pavarësisht se përfundoi në barazim.
‘Bardheblutë’ e Tiranës kanë vijuar të mos gjejnë rrugën e fitores në derbin e madh të Tiranës, teksa në mitikun e kryeqytetit, ‘Arena Kombëtare’ mbyllën gjithçka në barazimin e bardhë 0-0 ndaj rivalëve të përjetshëm, Partizanit.
Loja ishte goxha e zjarrtë, skuadrat patën raste të shumta shënimi, ku më flagranti ishte edhe goli i shënuar i ‘Bardhebluve’, nga Gjumsi në pjesën e parë të sfidës, që më pas u anulua pas një rishikimi të aksionit, me anë të sistemit VAR.
‘Bardheblutë’ e drejtuar nga Magani ishin shumë pranë fitores në këtë sfidë pasi fituan një penallti në shtesë pasi topi u prek me dorë nga një prej futbollistëve të Partizanit. Megjithatë, në minutën e 7 të shtesës, Prenga goditi, por penalltia u prit nga portieri i Partizanit.
Falë këtij rezultati, Partizani mbetet në vendin e parë të tabelës me 28 pikë, ndërsa Tirana në vendin e 7-të me 16 pikë.
