Kryedemokrati Sali Berisha ka paralajmëruar sot protesta kombëtare para kryeministrisë duke thënë se së shpejti do të bëhet publike thirrja për protestën e parë të madhe përballë qeverisë së Ramës.
Ai tha se protestat do të vijojnë dhe se opozita do të shpalosë para kryeministrisë platformën e saj para qytetarëve duke qenë se në Kuvend të gjitha ligjet po kalohen pa debat.
“Protestat kombëtare janë tejet të vonuara dhe së shpejti do komunikojmë para jush protestën e parë kombëtare dhe pastaj në vazhdim ku ftoj të gjithë ata qytetarë që janë të gatshëm të luftojnë për votën e lirë kundër një regjimi që ka konfiskuar atë, e ka vjedhur atë, kundër një regjimi që ka përdorur të gjithë potencialin ekzekutiv, shtetëror, financiar, logjistik e mediatik për të ndikuar e blerë votën e shqiptarëve.
Përpjekja jonë për të transformuar parlamentin në një tribunë të fjalës së qytetarëve dhe të interesave të tyre, has në absurditetin dhe banditizmin e paprecedentë parlamentar në historinë e vendit. Qeveria u miratua pa debat, program pa debat, buxheti dje pa debat. Të gjitha pa debat, atëherë ne do të hapim platformën parlamentare qytetare para kryeministrisë si hapi i parë. Ne ndaj këtij regjimi jemi të vendosur të qëndrojmë me të gjithë potencialin dhe forcën tonë”- deklaroi Berisha. Versus.al
