Pas një proteste që degjeneroi në dhunë dhe ku u hodhën Molotov drejt Vilës 31, ish-kryeministri dhe lideri i Partisë Demokratike, Sali Berisha, ka thirrur militantët për një tubim tjetër nesër në orën 18:00.
Sipas një mesazhi të shpërndarë brenda strukturave të PD-së, protesta do të nisë para kryeministrisë në Bulevardin Dëshmorët e Kombit, por ende nuk janë bërë të ditura detajet e plota të saj.
Nuk dihet nëse do të ketë fjalime nga podiumi përballë godinës së qeverisë, apo një tur nëpër kryeqytet, siç ndodhi më parë, ku molotovët rrezikuan jetën e artistëve brenda ish-vilës së diktatorit.
Në mesazhin e shpërndarë, Berisha shkruan:
“Të dashur demokratë, Edi Rama është izoluar ndërkombëtarisht. Në përplasje me drejtësinë. Rezistenca jonë nuk ndalet deri në largimin e tij, deri në qeveri teknike dhe zgjedhje të lira. Detyra jonë, është ta rrëzojmë. E diel, Ora 18.00 – Në Bulevard.”
Ndërkohë, mesazhet e ndërkombëtarëve kanë qenë të ashpra ndaj dhunës në protestat e fundit, gjë që ka bërë që Berisha të organizojë tubime më paqësore, si ai përpara Kuvendit kur mazhoranca refuzoi arrestimin e ministrës Belinda Balluku.
Autoritetet lokale po paralajmërojnë qytetarët për masat e sigurisë gjatë tubimit, ndërsa mbetet për t’u parë nëse protesta e nesërme do të zhvillohet në mënyrë paqësore apo do të ketë tensione të reja./Versus.al
