Seanca gjyqësore në gjykatën e Fierit ku Fredi Beleri kërkon lirinë me kusht nga dënimi me 2 vite burg, është shtyrë për në datën 31 korrik si argument mungesën e dokumentacioneve në kërkesën e ish-kryebashkiakut të zgjedhur të Himarës.
Beleri mbërriti në seancë me pranga në duar dhe qëndroi për rreth 20 minuta, para se të kthehej sërish në qelinë e burgut të Fierit aty ku po vuan dënimin e caktuar nga GJKKO për blerjen e votave në zgjedhjet vendore të 14 majit 2023.
Ditë më parë Beleri përfitoi leje 5 ditore nga Drejtoria e Burgjeve për t’u betuar si eurodeputet i Greqisë në Parlamentin Europian. Para se të nisej në Bruksel ai shkoi në Athinë ku u takua me Mitsotakis dhe bëri deklarata nacionaliste. Ndërsa pasi u kthye nga Brukseli tha se ishte në pritje të miratimit të kërkesës së tij për lirimin me kusht nga qelia.
Më 5 korrik, Komisioni Qendror i Zgjedhjeve i hoqi Fredi Belerit mandatin si kryebashkiak i zgjedhur i Himarës në kushtet e pavlefshmërisë për shkak se nuk mund ta ushtronte pasi vuante dënimin në qelinë e burgut të Fierit. Versus.al
