Elbasan- Me urdhër të Prokurorisë së Posaçme (SPAK), agjentët e BKH kanë zbarkuar mëngjesin e sotëm në qytet ku kanë kryer kontrolle në një biznes që ushtron veprimtarinë e tij si kompani ndërtimi.
Raportohet se kontrollet lidhen me dyshimet se kjo kompani ka përfituar tendera në mënyrë të paligjshme. Në orën 06:30 të mëngjesit agjentët kanë mbërritur në zyrat e biznesit ku kanë sekuestruar telefonat e punonjësve.
Dyshohet se kompania është në pronësi të personave të afërt të lidhur me të shumëkërkuarin Suel Çela i cili është në arrati që prej vitit 2022 dhe akuzohet si i përfshirë në disa ngjarje kriminale të ndodhura në Elbasan.
Burime bëjnë me dije për Versus.al se janë ushtruar kontrolle edhe në banesën e Luan Tabakut, drejtorit të Ujësjellës Kanalizimeve në Elbasan ku janë sekuestruar disa dokumente. Deri më tani, SPAK nuk ka dalë me një komunikatë zyrtare për rastin konkret. Versus.al
