Një dëshmi tronditëse ka dalë nga një banore e Tolentinos, qyteti italian ku u vra brutalisht Gentiana Hudhra, shqiptarja 45-vjeçare, nga ish-bashkëshorti i saj.
“Isha në bar kur dëgjova një britmë tmerruese. Dola jashtë dhe pashë një sherr mes një burri dhe një gruaje. Ajo në një moment ra në tokë, e pafuqishme, ndërsa ai vazhdonte ta godiste me këmbë. Thirra menjëherë 118-in, iu afrova dhe pashë shumë gjak. Ai ishte ulur në një stol, pothuajse i kënaqur, dhe thoshte: ‘Unë e bëra, jam mirë. Po pres’,” rrëfen ajo.
Në vendngjarje shkoi edhe kryetari i bashkisë së Tolentinos, Mauro Sclavi, i cili theksoi dhimbjen që po përjeton komuniteti pas serisë së ngjarjeve tragjike në pak ditë. Ai përmendi edhe mbështetjen psikologjike të organizuar për dy fëmijët e Gentianës.
Gentiana ishte një anëtare e integruar e komunitetit, me jetë të qetë dhe e respektuar nga banorët vendas dhe bashkatdhetarët.
Hetuesit po punojnë për të zbardhur arsyet që çuan ish-bashkëshortin në këtë akt brutal, duke hetuar edhe nëse ai ka pasur probleme psikike ose trajtim të mëparshëm. Ngjarja po trajtohet si vrasje me paramendim dhe me rrethanë rënduese. Versus.al
