Tre persona janë vënë në pranga për furnizimin me kokainë të disa grupeve kriminale, në kuadër të operacionit “Cargo 2”. Në Unazë të Madhe, pranë rrethrrotullimit të TEG-ut, Policia ka ndaluar automjetin tip “Escalade” me drejtues 32-vjeçarin Alban Kopaçin dhe pasagjerët Elvi Metën, 26 vjeç, e Igli Canajn, 32 vjeç.
Gjatë kontrollit të menjëhershëm në automjet, efektivët kanë gjetur e sekuestruar një pako me rreth 1 kilogram e 37 gramë kokainë të pastër.
Në shtëpinë e Alban Kopaçit u krye një kontroll i detajuar, ku u gjetën e sekuestruan 121 mijë euro cash, 60 milionë lekë shqiptare dhe 5 mijë paund sterling.
Gjithashtu, autoritetet kanë konfiskuar veturën “Escalade”, një pistoletë, një armë gjahu, municion përkatës dhe disa celularë të dyshuar për komunikime të koduara.
Materialet procedurale i janë kaluar Prokurorisë për veprime të mëtejshme.
Njoftimi:
Tiranë
Finalizohet me sukses operacioni policor i koduar “Cargo 2”, në vazhdën e operacioneve të njëpasnjëshme, kundër shitjes të lëndëve narkotike.
Vihen në pranga 3 shtetas të cilët në bashkëpunim me njëri-tjetrin, furnizonin me lëndë narkotike kokainë, disa grupe shpërndarësish.
Sekuestrohen 1 kg e 36.6 gramë lëndë e dyshuar narkotike kokainë, 1 armë zjarri pistoletë, 1 armë gjahu, 121 000 euro, 60 milion lekë, 5000 paund dhe sende të tjera rë kundërligjshme.
Specialistët e Seksionit të Hetimit të Narkotikëve, në vijim të operacioneve policore kundër veprimtarive kriminale në fushën e narkotikëve, pas një pune të mirëorganizuar organizuan dhe finalizuan me sukses operacionin policor të koduar “Cargo 2”.
Në kuadër të këtij operacioni u bë arrestimi në flagrancë i shtetasve:
-E. M., 26 vjeç, I. C., 33 vjeç dhe A. K., 32 vjeç, banues në Tiranë.
Në Unazë të Madhe, në afërsi të rrethrrotullimit të Tegut, shërbimet e Policisë kanë lokalizuar automjetin tip “Escalade” me drejtues shtetasin A. K. dhe pasagjerë shtetasit E. M, dhe I. C. Gjatë kontrollit në automjet është gjetur një pako me lëndë të dyshuar narkotike të llojit kokainë, me peshë 1 kg e 36.6 gramë.
Nga verifikimet e kryera ka rezultuar se këta shtetas, në bashkëpunim me njëri-tjetrin, siguronin lëndë të dyshuar narkotike të llojit kokainë dhe më pas furnizonin disa grupe shpërndarësish, në zona të ndryshme të Tiranës.
Gjatë kontrollit të banesës së shtetasit A. K, shërbimet e Policisë gjetën e sekuestruan në cilësinë e provës materiale 1 armë zjarri pistoletë, 1 armë gjahu, municion luftarak, 121 000 euro, 60 milion lekë, 5000 paund të cilat u sekuestruan në cilësinë e provës materiale sëbashku me lëndën narkotike, automjetin dhe 5 aparate celular.
Materialet proceduale i kaluan Prokurorisë, për veprime të mëtejshme.
