Një atentat i rëndë në Balldren të Lezhës i mori jetën Kreshnik Mujecit dhe bashkëshortes së tij, Gentjana Mujeci, ndërsa pista kryesore e hetimit po lidhet me hakmarrjen.
Ngjarja rikthen në qendër të vëmendjes fenomenin e gjakmarrjes, i cili, ndonëse i goditur nga institucionet, vijon të prodhojë viktima edhe sot.
Sipas një studimi i mbështetur në të dhëna policore, në Shqipëri janë identifikuar qindra familje të prekura nga gjakmarrja, me përqendrim më të madh në veri të vendit.
Raportet e publikuara ndër vite kanë treguar se fenomeni ka prekur familje në Shkodër, Lezhë, Dibër, Kukës, Tiranë dhe Durrës, ndërsa një pjesë e tyre jetojnë të ngujuara ose janë larguar nga vendi.
Fenomeni lidhet me një kulturë të vjetër hakmarrjeje që shpesh shtrihet përtej konfliktit fillestar dhe prek edhe breza të rinj e anëtarë të pafajshëm të familjes.
Raporti i Avokatit të Popullit e ka cilësuar gjakmarrjen një problem serioz për të drejtën e jetës dhe ka kërkuar masa të koordinuara institucionale për parandalimin dhe eliminimin e saj.
Në vitet e fundit, përpjekjet e institucioneve janë përqendruar te hetimi penal, mbrojtja e viktimave të mundshme dhe ndërgjegjësimi publik, por dukuria mbetet ende e pranishme në shoqëri.
Pikërisht për këtë arsye, çdo ngjarje e lidhur me hakmarrjen shihet jo vetëm si një krim i rëndë, por edhe si dëshmi e një problemi më të thellë social dhe kulturor./Versus.al
