Një operacion i përbashkët ushtarak dhe policor në zonat Rinconada dhe Ayampe, në provincën Santa Elena të Ekuadorit, ka çuar në shpëtimin e dy shtetasve shqiptarë dhe tre qytetarëve ekuadorianë.
Personat e shpëtuar ishin mbajtur peng në një fermë, e cila dyshohet të kishte shërbyer si bazë operacionale për grupin kriminal “Los Choneros”.
Operacioni nisi në orët e para të mëngjesit, duke përfunduar me përplasje të zgjatur të armatosur midis forcave të sigurisë dhe trafikantëve të drogës.
Gjatë shkëmbimit të zjarrit, u qëllua dhe një anëtar i dyshuar i “Los Choneros”, i cili u vra në vendngjarje. Gjithashtu, katër persona të tjerë u arrestuan gjatë operacionit.
Gjatë kontrollit të zonës, u sekuestruan armë të rënda, përfshirë katër pistoleta dhe 74 fishekë 9 mm, si dhe disa telefona celularë. Gjithashtu, u gjet një paketë me lidhëse plastike, e dyshuar se është përdorur për lidhjen e pengjeve.
Personi i vrarë ende nuk është identifikuar zyrtarisht, por besohet të ketë qenë anëtar aktiv i grupit kriminal “Los Choneros”, i njohur për dhunën dhe aktivitetet e paligjshme në rajon.
Autoritetet ekuadoriane nuk kanë bërë të ditur identitetin e dy shqiptarëve të shpëtuar, ndërsa hetimet vijojnë për të zbardhur plotësisht rrëmbjen dhe për të identifikuar lidhjet ndërkombëtare të grupit kriminal./ Versus.al
Pamje nga operacioni:
