Mbërrin në shtëpi, trupi i 33-vjeçarit Dritan Lalaj, nga Frakulla e Vogël e Fierit. Trupi i pajetë është sjellë nga Hamburgu falë kontributit të komunitetit shqiptar në Gjermani dhe ndërhyrjes së zv/kryeministres, e cila vuri në lëvizje strukturat shtetërore për të bërë të mundur kthimin e tij në atdhe.
Ngjarja e rëndë ndodhi më 1 nëntor, kur Dritan Lalaj u gjet i pajetë në banesën e tij në Hamburg. Policia gjermane dyshon për një rast të vetëvrasjes, pasi i ndjeri kishte shfaqur më parë shqetësime për gjendjen e tij emocionale.
Familjarët kanë treguar se ai i kishte shkruar një letër kushëririt dy javë para ngjarjes, ku përmendte vështirësitë që po përjetonte pasi pronari nuk po i jepte pagesat, dhe mendimet për t’i dhënë fund jetës.
I rritur si fëmijë i vetëm, Dritani kishte përjetuar humbjen e nënës pesë vite më parë, ndërsa familja e tij ndodhet në kushte të vështira ekonomike.
Komuniteti shqiptar në Hamburg organizoi një fushatë solidariteti për të mbledhur fonde dhe për të ndihmuar familjen në kthimin e trupit të Dritanit në vendlindje.
