Kur kanë kaluar 5 ditë nga masakra e Dobraçit që la pas 4 të vrarë, ende nuk dihet të thuhet me siguri nëse personi i tretë që dyshohet të ketë qenë në mjetin e Hamza Licit dhe Arlind Bushatit, është i shumëkërkuari Ibrahim Lici. Madje as nëse është dikush tjetër. Personi misterioz që duket në video është zhdukur pak minuta pas ngjarjes, thjesht 'duke avulluar'.
Ndërkohë që policia as nuk e mohon dhe as nuk e pohon nëse në makinën që u qëllua me breshëri plumbash ka qenë edhe Ibrahim Lici, nga burime jo zyrtare thuhet se po kontrollohen klinikat ku dyshohet se personi “misterioz” mund të jetë kuruar duke u bërë kështu ndoshta i vetmi i mbijetuar i ‘kasaphanës’ së Dobraçit.
Dyshimet mbi mungesën e një informacioni të saktë nga ana e policisë shtohen pas publikimit të një tjetër fotoje ku personi i veshur me të zeza shfaqet i ulur pranë trupit të viktimës Hamza Lici dhe pas tij duket një efektiv policie i forcave “Shqiponja”.
Pavarësisht se të gjithë dëshmitarët okularë fillimisht shoqërohen në polici në rast të një ngjarje, kësaj here kjo praktikë duket se nuk ka funksionuar. Në një rast të tillë, çështja bëhet edhe më skandaloze kur personi nuk po arrihet të identifikohet pas 5 ditësh dhe dyshimet janë se mund të ketë qenë i shumëkërkuari Ibrahim Lici. Ky i fundit dyshohej se ishte në Turqi dhe në rast të vërtetimit të dyshimeve, atëherë ai ka arritur të hyjë në disa shtete pa u kapur dhe më pas të largohet edhe nga vendngjarja e masakrës më të rëndë në vitet e fundit. Pritet detaje të mëtejshme nga policia për të parë nëse dyshimet e ngritura qëndrojnë. Nëse po, do të ishte një tjetër skandal. Versus.al
